کانگریس کی حصولیابیوں پر اپنی مہر لگا کر بی جے پی اور عآپ عوام سے جھوٹی ہمدردی بٹور رہی: دیویندر یادو

نئی دہلی: ’’کانگریس کی دہلی حکومت کے ذریعہ شروع کیے گئے اشوک وہار جیلر والا باغ میں ای ڈبلیو ایس فلیٹس کے پروجیکٹ کا آج وزیر اعظم نریندر مودی کے ذریعہ افتتاح کرنا کوئی نیا واقعہ نہیں ہے۔ دہلی میونسپل کارپوریشن الیکشن کے دوران نومبر 2022 میں بھی مودی جی نے کالکا جی میں ای ڈبلیو ایس فلیٹس کی چابی 10 غریبوں کو دے کر دہلی کی عوام کو گمراہ کیا تھا، جبکہ کالکا جی میں بنے ہوئے فلیٹس کے الاٹمنٹ کا عمل آج تک مکمل نہیں ہوا۔‘‘ یہ بیان آج دہلی کانگریس صدر دیویندر یادو نے دیا ہے۔

دیویندر یادو نے کہا کہ کانگریس کے ذریعہ شیلا دیکشت حکومت کے کاموں اور حصولیابیوں پر بی جے پی اور عآپ اپنی مہر لگا کر پیش کر رہی ہے۔ دونوں ہی پارٹیاں دہلی اسمبلی انتخاب میں عوام کو گمراہ کرنے کے لیے صرف ووٹ کی سیاست کر رہی ہیں۔ انھوں نے مزید کہا کہ مودی جی نے جہاں سنٹرل وسٹا میں ہزاروں کروڑ روپے اور اروند کیجریوال نے اپنے عیش و آرام کے لیے شیش محل بنا کر عوام کے سینکڑوں کروڑ روپے برباد کر کے لوگوں کے تئیں جھوٹی ہمدردی دکھا کر جو اقتدار حاصل کرنے کی ادنیٰ سیاست کر رہے ہیں، اس کو عوام اب سمجھ چکی ہے۔ عوام کانگریس کے ذریعہ کیے گئے کاموں کو یاد کر رہی ہے اور آنے والے اسمبلی انتخاب میں کانگریس کو یکمشت ووٹ دینے کا ماحول بنا رہی ہے۔

دہلی کانگریس صدر کا کہنا ہے کہ کانگریس حکومت کے ذریعہ جیلر والا باغ میں 1675 ای ڈبلیو ایس فلیٹس، کالکا جی میں 3024 فلیٹس بنانے کا کام شروع کیا گیا تھا، اور اسی سلسلہ کو آگے بڑھاتے ہوئے کٹھ پتلی کالونی پروجیکٹ کے 2800 فلیٹس کی تعمیر شروع کرنے کا عمل بھی کانگریس حکومت نے پورا کیا جس کا کام 2014 میں شروع ہوا۔ لیکن 11 سالوں میں کیجریوال حکومت اور دہلی ڈیولپمنٹ اتھارٹی اس کام کو پورا کر پائی۔ کالکا جی میں 1862 فلیٹ کا الاٹنمنٹ ہوا جبکہ 1000 سے زیادہ لوگ آج بھی اپنا مکان ملنے کا انتظار کر رہے ہیں۔