بہار: چھپرہ واقع مندر میں پجاری کا قتل، حملہ آور مورتیوں سمیت سبھی زیورات لے کر فرار

بہار میں بی جے پی اور جنتا دل یو کی نتیش حکومت کے تمام دعووں کے باوجود جرائم کے واقعات میں کوئی کمی نہیں ہو رہی ہے۔ ریاست کے سارن ضلع واقع سٹی تھانہ علاقہ میں پیر کے روز جرائم پیشوں نے ایک مندر کو نشانہ بنایا جہاں پجاری کا قتل کر دیا اور مندر میں موجود مورتیوں کے ساتھ ساتھ زیورات بھی لوٹ کر فرار ہو گئے۔

پولیس کے ایک اعلیٰ افسر نے بتایا کہ افار گاؤں واقع قدیم رام جانکی مندر میں شام کی پوجا کے بعد کھانا کھا کر پجاری گورکھناتھ داس رات کو سو گئے۔ اندیشہ ظاہر کیا جا رہا ہے کہ دیر رات بدمعاش مندر میں داخل ہوئے اور قیمتی مورتیاں و زیورات لوٹ کر چلتے بنے۔ بتایا جاتا ہے کہ اس دوران مندر کے پجاری گورکھناتھ داس (75 سال) نے مخالفت کی جس کے پیش نظر بدمعاشوں نے ان کا قتل کر دیا اور فرار ہو گئے۔

بتایا جاتا ہے کہ صبح جب دیہی عوام مندر میں پوجا کرنے پہنچے تب انھیں پورے معاملے کی جانکاری ہوئی۔ گاؤں میں اس کی اطلاع ملتے ہی مندر میں بھیڑ امنڈ پڑی۔ اس کے بعد اس کی خبر پولیس کو دی گئی۔ خبر ملنے پر پہنچی پولیس نے لاش کو قبضے میں لے کر جائے واقعہ پر جانچ شروع کر دی۔ پولیس افسر نے بتایا کہ پورے معاملے کی تفتیش کی جا رہی ہے۔ پجاری کی لاش کو پولیس نے اپنے قبضے میں لے کر پوسٹ مارٹم کے لیے اسپتال بھیج دیا ہے۔

اس واقعہ کے بعد پولیس کے تئیں لوگوں میں زبردست غصہ دیکھنے کو مل رہا ہے۔ کچھ لوگ اس واقعہ کے پیچھے زمین تنازعہ کو وجہ بتا رہے ہیں۔ قابل ذکر بات یہ بھی ہے کہ چھپرہ میں ایک ہفتہ قبل ہی نقاب پوش جرائم پیشوں نے کاشی بازار واقع پی این جویلرس میں گھس کر تقریباً ایک کروڑ روپے کے زیور لوٹ لیے تھے۔