بہار: پٹنہ کا بیلی روڈ اب کہلائے گا ’نہرو پتھ‘، نتیش کمار نے لگائی مہر

بہار کے پٹنہ واقع بیلی روڈ کو اب ’نہرو پتھ‘ کے نام سے جانا جائے گا۔ پہلے اس کا نام جواہر لال نہرو مارگ کیا گیا تھا، لیکن عام لوگوں کو یہ نام بولنے میں کافی دقت ہوتی ہے یا زبان پر نہیں چڑھنے کی وجہ سے اس کا نام بدلا گیا ہے۔ آج بھی عام بول چال میں لوگ اس سڑک کو بیلی روڈ ہی کہتے ہیں۔ اسی وجہ سے اس سڑک کا نام اب نہرو پتھ کر دیا گیا۔ وزیر اعلیٰ نتیش کمار نے کابینہ کی ہوئی میٹنگ میں اسے منظوری دی ہے۔

چلیے آپ کو بتاتے ہیں کہ بیلی روڈ کا نام بدل کر جواہر لال نہرو کب کیا گیا۔ سال 1912 میں بنگال تقسیم کے بعد پٹنہ کو بہار-اڑیسہ کی راجدھانی بنایا گیا۔ بانکی پور میں جگہ کی کمی کے سبب مغرب کی جانب شہر کی توسیع کی گئی۔ یہ کام بہار-اڑیسہ علاقہ کے پہلے لیفٹیننٹ گورنر سر اسٹیورٹ کالون بیلی نے کیا تھا۔ اسی وجہ سے اہم سڑک کا نام بیلی روڈ ہو گیا۔ آزادی کے بعد اس کا نام ملک کے پہلے وزیر اعظم جواہر لال نہرو کے نام پر کر دیا گیا، لیکن آج بھی یہ بیلی روڈ کے نام سے ہی مشہور ہے۔ اب نتیش کمار نے بیلی روڈ کا نام پھر بدل کر نہرو پتھ کر دیا ہے۔