مدھیہ پردیش میں بی جے پی کو لگا شدید جھٹکا، سندھیا حامی بیجناتھ یادو نے تھاما کانگریس کا ہاتھ

مدھیہ پردیش میں آج بی جے پی کو شدید جھٹکا اس وقت لگا جب مرکزی وزیر جیوترادتیہ سندھیا کے حامی بیجناتھ یادو نے اپنے سینکڑوں حامیوں کے ساتھ کانگریس کا دامن تھام لیا۔ انھیں پی سی سی چیف کملناتھ نے بدھ کے روز کانگریس کی رکنیت دلائی۔

کانگریس میں شامل ہونے کے بعد بیجناتھ سنگھ نے کہا کہ میں سندھیا کے ساتھ بی جے پی میں گیا تھا۔ مجھے تین سال سے گھٹن ہو رہی تھی، کیونکہ وہاں کوئی احترام نہیں ملا۔ انھوں نے کہا کہ ’’میری پوری عمر کانگریس کے ساتھ گزری ہے اور میرے والد محترم بھی کانگریس میں ہی تھے۔ میں پوری طرح کانگریس کے ساتھ ہوں اور اب اپنا ہر وقت کانگریس کو دوں گا۔‘‘

واضح رہے کہ بیجناتھ یادو مرکزی وزیر جیوترادتیہ سندھیا کے کٹر حامی تصور کیے جاتے ہیں۔ جب جیوترادتیہ سندھیا کانگریس کو چھوڑ کر بی جے پی میں شامل ہوئے تھے تو بیجناتھ بھی ان کے ساتھ کانگریس کو چھوڑ کر بی جے پی میں چلے گئے تھے، لیکن اب بیجناتھ یادو کا بی جے پی سے دل ٹوٹ گیا ہے۔ آج انھوں نے سابق وزیر اعلیٰ دگ وجئے سنگھ، سابق مرکزی وزیر ارون یادو اور رکن اسمبلی جئے وردھن سنگھ کی موجودگی میں کانگریس کی رکنیت حاصل کی ہے۔