بارہمولہ: ملی ٹنٹ حملے میں تین سیکورٹی فورسز اہلکار جاں بحق

سری نگر: شمالی کشمیر کے ضلع بارہمولہ کے کریری میں پیر کی صبح ملی ٹنٹوں نے سیکورٹی فورسز کی ایک مشترکہ پارٹی پر حملہ کر کے سینٹرل ریزرو پولیس فورس (سی آر پی ایف) کے دو اہلکاروں اور جموں و کشمیر پولیس کے اسپیشل پولیس آفیسر (ایس پی او) کو ہلاک کر دیا۔ جموں و کشمیر پولیس کے ایک ترجمان نے حملے کی تصدیق کرتے ہوئے کہا کہ اس میں شدید زخمی ہونے والے تین سیکورٹی فورسز اہلکار زخموں کی تاب نہ لاتے ہوئے دم توڑ گئے ہیں۔

ترجمان نے کہا کہ 'بارہمولہ کے کریری میں ملی ٹنٹوں نے پولیس اور سی آر پی ایف کی ایک مشترکہ ناکہ پارٹی پر فائرنگ کی۔ دو سی آر پی ایف اور ایک جموں و کشمیر پولیس اہلکار شدید زخمی ہوئے۔ انہیں اسپتال لے جایا گیا جہاں وہ زخموں کی تاب نہ لاتے ہوئے دم توڑ گئے۔ علاقے میں تلاشی آپریشن جاری ہے'۔ مہلوک سی آر پی ایف اہلکاروں کی شناخت کانسٹیبل ڈرائیور خورشید خان اور کانسٹیبل شرما لوکش کے طور پر ہوئی ہے۔ مہلوک ایس پی او کی شناخت مظفر احمد کے بطور کی گئی ہے۔

واضح رہے کہ وادی میں گزشتہ چار دنوں کے دوران سیکورٹی فورسز پر ہونے والا یہ دوسرا بڑا حملہ ہے۔ قبل ازیں 14 اگست کو سری نگر کے مضافاتی علاقے نوگام میں ہونے والے ملی ٹنٹ حملے میں جموں و کشمیر پولیس کے دو اہلکار ہلاک جبکہ تیسرا زخمی ہوگیا تھا۔ سرکاری ذرائع نے بارہمولہ کے کریری میں پیر کی صبح ہونے والے حملے کی تفصیلات فراہم کرتے ہوئے کہا کہ ملی ٹنٹوں نے سیکورٹی فورسز کی ایک مشترکہ پارٹی پر اندھا دھند فائرنگ کی۔

ترجمان نے کہا کہ سیکورٹی فورسز نے جوابی فائرنگ کی اور طرفین کے درمیان فائرنگ کا تبادلہ کچھ دیر تک جاری رہا۔ سرکاری ذرائع نے بتایا کہ ملی ٹنٹوں کی ابتدائی فائرنگ میں دو سی آر پی ایف اہلکار اور ایک ایس پی او زخمی ہوئے۔ اگرچہ انہیں فوری طور پر اسپتال منتقل کیا گیا لیکن وہ جانبر نہ ہوسکے۔ انہوں نے مزید کہا کہ علاقے کو چاروں اطراف سے محاصرے میں لیکر تلاشی آپریشن شروع کیا گیا ہے۔