مدھیہ پردیش: بجرنگ دل کارکنان کھلے عام لے رہے ہیں ہتھیار چلانے کی تربیت

مدھیہ پردیش میں بجرنگ دل کی طرف سے کارکنان کو ہندؤوں کی حفاظت کے نام پر ہتھیار چلانے کی تربیت دی جا رہی ہے۔ راج گڑھ میں منعقدہ اس کیمپ میں کارکنان کو ہتھیار چلانے کے ساتھ ساتھ لاٹھی چلانے کی بھی تربیت دی جا رہی ہے۔

میڈیا سے بات کرتے ہوئے بجرنگ دل کے ضلع کنوینر دیوی سنگھ سوندھیا نے کہا کہ یہ ایک مستقل منعقد ہونے والا کیمپ ہے اور اسے ہر سال منعقد کیا جاتا ہے۔ سوندھیا نے کہا کہ تربیتی کیمپ کا مقصد ملک دشمن عناصر اور لو جہاد کرنے والوں سے نمٹنا ہے۔

یہ پہلا معاملہ نہیں ہے جب بجرنگ دل کے کارکنان کو ہندؤوں کی حفاظت کے نام پر کھلے عام ہتھیار چلانے کی تربیت دی جا رہی ہے۔ 2016 میں بجرنگ دل کی طرف سے ایودھیا میں ایک ٹرینگ کیمپ لگایا گیا تھا جس میں کارکنان نے رائفل، تلوار اور لاٹھی چلانے کی تربیت لی تھی۔

ملک میں اکثر بجرنگ دل کے کارکنان ہندو تہذیب بچانے کے نام پر مارپیٹ کرتے دیکھے جاتے ہیں ہر سال ویلینٹائنس ڈے کے موقع پر یہ جوڑوں کے ساتھ بدسلوکی اور مارپیٹ کرتے ہیں۔ اس کے باوجود انتظامیہ کی طرف سے ان پر کوئی سخت کارروائی نہیں کی جاتی۔