امر سنگھ کی بیٹیوں پر تبصرہ معاملہ میں اعظم خان کو ملی راحت، ایم پی-ایم ایل اے کورٹ نے کیا بری

آنجہانی امر سنگھ کی بیٹیوں پر تبصرہ معاملہ میں سماجوادی پارٹی لیڈر اعظم خان کو آج بڑی راحت نصیب ہوئی۔ عدالت نے اس مقدمہ میں اعظم خان کو بری کرنے کا فیصلہ سنایا ہے۔ اعظم خان کے ذریعہ قابل اعتراض تبصرہ کے الزام میں امر سنگھ نے گومتی نگر تھانہ میں ایف آئی آر درج کرائی تھی۔ اس معاملے میں آج ایم پی-ایم ایل اے کورٹ میں سماعت تھی۔ اعظم خان کو لینے ایک گاڑی رامپور جیل گئی تھی، لیکن وہ اس میں نہیں بیٹھے۔ خرابیٔ طبیعت کا حوالہ دیتے ہوئے اعظم خان ایم پی-ایم ایل اے کورٹ میں ویڈیو کانفرنسنگ کے ذریعہ پیش ہوئے۔

قابل ذکر ہے کہ 2018 میں امر سنگھ نے الزام عائد کیا تھا کہ اعظم خان نے ایک انٹرویو میں ان کی بیٹیوں کو ’ایسڈ حملہ‘ کی دھمکی دی تھی۔ اس معاملے میں انھوں نے گومتی نگر پولیس اسٹیشن میں شکایت درج کرائی تھی، جس پر پولیس نے ان کے خلاف ایف آئی آر درج کی تھی۔ اعظم خان کے خلاف تعزیرات ہند کی دفعات 153اے، 295اے اور 506 کے تحت کارروائی ہوئی تھی۔ شکایت درج کرانے کے ساتھ ہی امر سنگھ نے کہا تھا کہ وہ بیٹیوں کی حفاظت چاہتے ہیں۔ انھوں نے حکومت سے سیکورٹی کا مطالبہ بھی کیا تھا۔

واضح رہے کہ رواں مہینے میں ہی اعظم خان کو ایک دیگر مقدمہ میں شدید جھٹکا لگا تھا۔ ایم پی-ایم ایل اے کورٹ نے اعظم اور ان کے بیٹے عبداللہ اعظم کو 2 پین کارڈ معاملے میں قصوروار قرار دیا تھا۔ اس مقدمہ میں عدالت نے فیصلہ سناتے ہوئے انھیں 7 سال قید کی سزا سنائی تھی۔ یہ معاملہ عبداللہ اعظم کی طرف سے 2 الگ الگ پیدائش سرٹیفکیٹ کی بنیاد پر 2 پین کارڈ بنوانے سے متعلق ہے۔ اس معاملے میں رکن اسمبلی آکاش سکسینہ نے 2019 میں کیس درج کرایا تھا، اس میں اعظم خان اور ان کے بیٹے پر معاملہ درج کرایا گیا تھا۔ اس معاملے میں عرضی گزار بی جے پی رکن اسمبلی آکاش سکسینہ نے سماجوادی پارٹی لیڈر اعظم خان کو بھی ملزم بنایا تھا۔