نیٹ-یو جی 2026 پیپر لیک کے پیچھے سیاسی تحفظ، اروند کیجریوال کا مرکز پر شدید حملہ

نئی دہلی: عام آدمی پارٹی کے قومی کنوینر اروند کیجریوال نے منگل کو نیٹ-یو جی 2026 پیپر لیک معاملے پر مرکزی حکومت پر سخت حملہ کرتے ہوئے الزام لگایا کہ امتحانی مافیا کو سیاسی تحفظ حاصل ہے، اسی وجہ سے بار بار اہم امتحانات کے پرچے لیک ہو رہے ہیں اور لاکھوں طلبہ کا مستقبل خطرے میں پڑ رہا ہے۔

اروند کیجریوال نے پریس کانفرنس کے دوران کہا کہ نیٹ امتحان کا پرچہ لیک ہونا صرف ایک انتظامی ناکامی نہیں بلکہ اس کے پیچھے اوپری سطح پر ملی بھگت موجود ہے۔ انہوں نے کہا کہ ایسے جرائم میں ملوث افراد کو سیاسی سرپرستی حاصل ہونے کی وجہ سے ہی پیپر لیک جیسے واقعات رک نہیں پا رہے ہیں۔

انہوں نے مرکزی حکومت کی خاموشی پر سوال اٹھاتے ہوئے کہا کہ لاکھوں طلبہ سال بھر سخت محنت کرتے ہیں، ان کے والدین بے شمار قربانیاں دیتے ہیں، لیکن جب امتحان کا پرچہ لیک ہوتا ہے تو پورے خاندان کو شدید ذہنی اذیت کا سامنا کرنا پڑتا ہے۔ انہوں نے کہا کہ حکومت کو یہ سمجھنا چاہئے کہ ایسے واقعات نوجوانوں کے اعتماد کو کس حد تک متاثر کرتے ہیں۔

قومی جانچ ایجنسی نے منگل کو 3 مئی کو منعقد ہونے والا نیٹ-یو جی 2026 امتحان منسوخ کرنے کا اعلان کیا۔ یہ فیصلہ امتحانی عمل میں بے ضابطگیوں سے متعلق مرکزی ایجنسیوں کو ملی اطلاعات کے بعد لیا گیا۔

اروند کیجریوال نے کہا کہ یہ پہلا موقع نہیں ہے جب نیٹ امتحان کا پرچہ لیک ہوا ہو۔ انہوں نے دعویٰ کیا کہ 2017، 2021، 2024 اور اب 2026 میں بھی اسی طرح کے واقعات سامنے آ چکے ہیں۔ انہوں نے حکومت سے سوال کیا کہ گزشتہ پیپر لیک معاملات میں ملوث افراد کے خلاف کیا کارروائی کی گئی اور اصل ذمہ دار کون تھے۔

انہوں نے کہا کہ اگر حکومت بغیر پیپر لیک کے ایک امتحان بھی شفاف انداز میں منعقد نہیں کرا سکتی تو پھر بہتر طرز حکمرانی کی امید کیسے کی جا سکتی ہے۔ دہلی کے سابق وزیر اعلیٰ نے امتحانی نظام کی نگرانی کرنے والے اعلیٰ افسران کے خلاف سخت کارروائی کا مطالبہ کرتے ہوئے کہا کہ جو لوگ منصفانہ امتحان کرانے میں ناکام رہے ہیں، انہیں جوابدہ بنایا جانا چاہئے۔

انہوں نے مزید کہا کہ لاکھوں طلبہ کا مستقبل داؤ پر لگا ہوا ہے، اس لیے ذمہ دار افراد کو سزا ملنی ضروری ہے تاکہ آئندہ ایسے واقعات دوبارہ نہ ہوں۔ اپنے طالب علمی کے دنوں کو یاد کرتے ہوئے اروند کیجریوال نے کہا کہ آئی آئی ٹی اور آئی اے ایس جیسی مسابقتی امتحانات کی تیاری کے دوران طلبہ اور ان کے والدین شدید دباؤ سے گزرتے ہیں، اس لیے امتحانی نظام میں شفافیت برقرار رکھنا انتہائی ضروری ہے۔

انہوں نے متاثرہ طلبہ سے اپیل کی کہ وہ پیپر لیک مافیا کے خلاف متحد ہو کر آواز اٹھائیں۔ اروند کیجریوال نے کہا کہ اگر طلبہ اپنے غصے اور ناراضگی کے اظہار کے لیے سڑکوں پر آنا چاہتے ہیں تو وہ ان کے ساتھ کھڑے ہیں۔