جموں و کشمیر سے آرٹیکل 370 کو منسوخ کر کے ہمیشہ کے لئے امن قائم کر دیا: امت شاہ

گڑگاؤں: مرکزی وزیر داخلہ امت شاہ نے منگل کو کہا کہ حکومت دہشت گردی کے خلاف ’زیرو ٹولرینس‘ کی پالیسی پر قائم ہے اور اسی کے تحت اب اس کے خلاف فیصلہ کن لڑائی جاری ہے۔ شاہ نے منگل کو ہریانہ کے گروگرام کے مانیسر میں نیشنل سیکورٹی گارڈ (این ایس جی) کے 35ویں یوم تاسیس پر اظہار خیال کرتے ہوئے کہا کہ دہشت گردی سب سے بڑی لعنت ہے اور ترقی کے راستے میں سب سے بڑی رکاوٹ بھی۔ انہوں نے کہا کہ ہندوستان اس سے لمبے وقت سے اس کے خاتمے کے لئے لڑائی لڑ رہا ہے۔حکومت دہشت گردی کے خاتمے کے لئے زیرو ٹولرینس کی پالیسی پر قائم ہے اور اس سے نمٹنے کے لئے وہ کوئی کثر نہیں چھوڑے گی۔

پاکستان پر دہشت گردی کو فروغ دینے کا الزام لگاتے ہوئے انہوں نے کہا کہ ہندوستان لمبے وقت سے پاکستان حمایت یافتہ دہشت گردی سے متاثر رہا ہے۔ اب حکومت نے جموں و کشمیر سے آرٹیکل 370 کو ہٹا کر وہاں ہمیشہ کے لئے امن قائم کرنے کی سمت میں بڑا قدم اٹھایا ہے۔ انہوں نے کہا کہ این ایس جی اور دیگر سیکورٹی دستے دہشت گردی کے خلاف فیصلہ کن لڑائی لڑ رہے ہیں۔

امت شاہ نے کہا کہ این ایس جی کے کمانڈو کی بہادری اور ہمت کے کارنامے دیکھ کر انہیں یقین ہے کہ فیصلہ کن لڑائی میں ملک کی جیت ہوگی۔ انہوں نے کہا کہ وزیر داخلہ ہونے کی حیثیت سے وہ لوگوں کو یقین دلانا چاہتے ہیں کہ این ایس جی کے ناقابل شکست مہارت کی وجہ سے ملک کی اندرونی سیکورٹی پر کوئی آنچ نہیں آئےگی کیونکہ ہمارے جانباز کمانڈو کسی بھی خطرے سے نمٹنے کے لئے پوری طرح قابل ہیں۔

امت شاہ نے قابل ذکر خدمات انجام دینے والے بہادر جوانوں اور افسروں کو تمغوں سے نوازا اور دستے کے شہید جانبازوں کو خراج عقیدت پیش کیا۔ اس موقع پر این ایس جی کے کمانڈو نے مختلف ہنگامی حالات میں دہشت گردوں کے خلاف اپنی مہارت کا مظاہرہ کیا۔ این ایس جی ڈائریکٹر جنرل ایس ایس دیشوال نے امت شاہ کو تحفہ میں یادگاری نشان دیا۔