حکومت، انتظامیہ اور عوام یکجا ہوکر کام کریں تو کسی بھی بحران پر قابو پایا جا سکتا ہے: یوگی

لکھنؤ: اترپردیش کے وزیر اعلی یوگی آدتیہ ناتھ نے ریاست کی ترقی کے ساتھ کورونا وبا سے مقابلے کے لئے اجتماعی شراکت داری کی ضرورت پر زور دیتے ہوئے ہفتہ کو کہا کہ 'ایک ہندوستان، مستحکم ہندوستان' کی تعمیر میں ریاستی حکومت اہم کردار ادا کر رہی ہے۔

یوگی نے یوم آزادی کے موقع پر منعقد تقریب سے خطاب کرتے ہوئے کہا کہ ایک ہندوستان-مستحکم ہندوستان کے مفروضے میں اترپردیش اہم کردار ادا کر رہا ہے۔ ریاست کی ترقی کی بات ہو یا کورونا بحران سے مقابلے کا چیلنج ان سبھی کے لئے 24 کروڑ لوگوں کو شراکت دار بننا ہوگا۔ ہم سب کے پاس موقع ہے تو کووڈ-19 جیسی ٹریجڈی بھی ہے۔ ٹیم جذبے کے ساتھ حکومت، انتظامیہ اور عوام ایک ہوکر کام کریں تو کسی بھی بحران پر فتح حاصل کی جا سکتی ہے۔

انہوں نے کہا کہ خود کفیل ہندوستان ہی خود کو دنیا کے سپرپاور کے طور پر پیش کرسکتا ہے۔ خود کفیل پیکیج کی اسکیم کے تحت حکومت نے بہت کام شروع کیے ہیں۔ لاک ڈاؤن کے درمیان فصلوں پر منفی اثر نہ پڑے، اس کی حکمت عملی انتظامیہ نے بنائی تھی۔ مزدور، محنت کش واپس آئے تو لوگوں کو احساس ہوا کہ لگتا ہے لاقانونیت پھیلے گی۔ لیکن ہم نے سب کو جوڑ کر کام کیا۔

وزیر اعلی نے کہا کہ جولائی کے مہینے میں گزشتہ سال کے مقابلے میں رینیو میں صرف تین فیصد کی کمی ہے۔ حکومت نے دو کروڑ کنبوں کو بیت الخلاء فراہم کرایا جبکہ آیوشمان بھارت اسکیم کا فائدہ ہر غریب اور ضرورت مند کو دیا گیا۔ بندیل کھنڈ ایکسپریس وے پروجیکٹ تیزی سے آگے بڑھ رہا ہے۔ ریاست کے چار شہروں میں میٹروں سہولیت پر تیزی سے کام چل رہا ہے۔

انہوں نے کہا کہ کانپور اور آگرہ میں میٹرو ریل کا کام جاری ہے۔ شعبہ صحت میں قابل ذکر ترقی ہوئی ہے۔ سال2017 میں صرف 12میڈیکل کالج تھے جبکہ گزشتہ تین سالوں میں 29میڈیکل کالج تعمیر کرائے گئے ہیں۔ یوگی نے دعوی کیا کہ مسلم خواتین کو انصاف دلانے کے لئے تین طلاق کے خلاف قانون سازی کی گئی تو وہیں آزادی کے 70 سال بعد آرٹیکل370 کو ختم کیا گیا۔ انہوں نے کہا کہ وزیر اعظم نریندر مودی کی قیادت میں جس طرح کی حکمت عملی تیار کی گئی اس کا نتیجہ ہے کہ ہندوستان محفوظ اور اطمینان بخش حالت میں ہے۔

وزیر اعلی نے کہا کہ کورونا کے خلاف لڑائی کو آگے بڑھانے کے لئے کورونا وئریرس پولیس، صفائی ملازمین، افسر، ڈاکٹروں کا وہ تہہ دل سے مبارک باد پیش کرتے ہیں جنہوں نے خدمت خلق کے جذبے سے کام کیا۔ انہوں نے کہا کہ حکومت نے ایک لاکھ 70 ہزار کروڑ روپئے کے اخراجات سے 80 کروڑ افراد تک مفت میں اناج دینے کی اسکیم کا آغاز کیا۔غریبوں، بے روزگاروں، مزدوروں کے لئے ہماری مشینری نے بہتر نتائج دئیے ہیں۔ لوگ سوچتے تھے کہ حالات بے حد خطرناک ہوجائیں گے لیکن کام اچھا ہوا ہے۔اپنے خطاب کے دوران وہ رام مندر کی تعمیر کا ذکر کرنا نہیں بھولے۔