امرتسر: مجیٹھا تھانہ میں گرینیڈ دھماکہ، ہیپی پسیا نے لی ذمہ داری، بڑی وارداتوں کو انجام دینے کا عزم کیا ظاہر

بیرون ملک میں بیٹھے بدنام زمانہ گینگسٹر ہیپی پسیا نیلی نے امرتسر واقع مجیٹھا تھانہ میں بدھ کی دیر شب ہوئے دھماکہ کی ذمہ داری قبول کر لی ہے۔ ملزم نے خالصتان تنظیم ببر خالصہ کی پوسٹ وائرل کی ہے۔ ساتھ ہی اس نے اپنے پوسٹ میں لکھا ہے کہ وہ اس سے بھی بڑی وارداتوں کو انجام دینے کی تیاری میں ہے۔

قابل ذکر ہے کہ مجیٹھا تھانہ میں دھماکہ بدھ کی شب تقریباً 11 بجے ہوا تھا۔ اس دھماکہ کے بعد علاقہ میں افرا تفری کا ماحول پیدا ہو گیا تھا۔ جمعرات کی صبح دھماکہ والی جگہ پر صاف صفائی کروا دی گئی ہے۔ جائے حادثہ پر تھانہ انچارج کے کمرے میں شیشے ٹوٹے پڑے ہوئے تھے اور دھماکہ کی وجہ سے سامان سب بھی بکھر گیا تھا۔ ایس ایس پی چرنجیت سنگھ نے اندیشہ ظاہر کیا تھا کہ حادثہ ٹائر پھٹنے کی وجہ سے ہوا ہے، لیکن جائے حادثہ کا معائنہ کرنے کے بعد صاف پتہ چل رہا تھا کہ یہ ٹائر پھٹنے کا واقعہ نہیں ہو سکتا۔

اب جبکہ ہیپی پسیا نے دھماکے کی ذمہ داری لے لی ہے، تو سب کچھ صاف ہوتا نظر آ رہا ہے۔ جو خبریں سامنے آ رہی ہیں اس میں بتایا جا رہا ہے کہ مجیٹھا تھانہ کے اندر ایک نامعلوم شخص نے ہینڈ گرینیڈ پھینکا تھا۔ گرینیڈ تھانہ کے بالکل اندر کھلی جگہ پر پھینکا گیا جس کے بعد زبردست دھماکہ ہوا۔ حرکت میں آئی پولیس نے فوراً تھانہ کے گیٹ کو بند کر لیا اور حالات کو سنبھالنے کی کوشش کی۔

قابل ذکر ہے کہ ہیپی پسیا نے ہی کچھ دن قبل اجنالا تھانہ کے باہر آئی ای ڈی رکھوا کر تھانے کو اڑانے کا منصوبہ بنایا تھا۔ غور کرنے والی بات یہ بھی ہے کہ 6 دن قبل ہی ضلع شہری علاقے میں بند پڑی چوکی گربخش نگر پر بھی گرینیڈ پھینک کر دھماکہ کیا گیا تھا۔ اس سے قبل 24-23 نومبر کی شب کو تھانہ اجنالا کے باہر آئی ای ڈی لگا کر اڑانے کا منصوبہ کا انکشاف ہوا تھا۔ گزشتہ 15 دنوں میں یہ تین واقعات ہو چکے ہیں۔ ابھی تک پولیس ان واقعات کے ملزم کا پتہ نہیں لگا سکی ہے، نہ ہی کوئی گرفتاری سامنے آئی ہے۔