لداخ میں داخل ہونے والے تمام لوگوں کا کورونا ٹیسٹ کیا جائے گا: رگزن سمفل

لیہہ: لداخ یونین ٹریٹری انتظامیہ کے ترجمان رگزن سمفل نے کہا ہے کہ لداخ میں داخل ہونے والے تمام لوگوں کا کورونا ٹیسٹ کیا جائے گا۔ انہوں نے کہا کہ یہ فیصلہ یونین ٹریٹری میں گزشتہ چند روز کے دوران کورونا کے مثبت کیسز میں درج ہو رہے اضافے کے پیش نظر لیا گیا ہے۔

موصوف ترجمان نے یہاں نامہ نگاروں کے ساتھ بات کرتے ہوئے کہا کہ 'ہم نے لداخ میں داخل ہونے کے لئے تمام داخلی پوائنٹس پر سیمپلنگ ٹیمیں تعینات کر رکھی ہیں جو بھی لداخ میں داخل ہوگا اس کے کورونا ٹیسٹ کے لئے نمونے لئے جائیں گے صرف ٹرکوں کو الگ رکھا گیا ہے کیونکہ وہ ایک راؤنڈ میں واپس چلے جاتے ہیں'۔ انہوں نے کہا کہ گزشتہ دنوں کے دوران یونین ٹریٹری میں کورونا کے مثبت کیسز میں ہو رہے اضافے کے پیش نظر یہ فیصلہ لیا گیا ہے۔ انہوں نے کہا کہ مثبت کیسز میں مزدور طبقے کی تعداد زیادہ ہے۔

رگزن سمفل نے کہا کہ لداخ میں ہمارے پاس چھوچھٹ میں ایک لیبارٹری ہے اس میں ایک مشین پہلے ہی تھی اور ابھی دوسری میشن لائی گئی ہے۔ انہوں نے کہا کہ ہم نے چالیس لیبارٹری اسسٹنٹس کی بھرتی عمل میں لائی ہے جن کو بیس دنوں کی تربیت دی جا رہی ہے۔ موصوف نے کہا کہ ہم ڈبل شفٹس میں کام کر رہے ہیں جس سے ہماری سیمپلنگ کی تعداد بڑھ رہی ہے۔