علی پور کورٹ نے محمد شامی کو دی راحت، چیک باؤنس معاملے میں ہوئے بری

ہندوستانی تیز گیندباز محمد شامی کو علی پور کورٹ نے چیک باؤنس معاملے میں راحت دی ہے۔ عدالت نے انہیں بری کر دیا ہے۔ دراصل محمد شامی کی بیوی حسین جہاں (جو ابھی ان سے الگ رہ رہی ہیں) نے الزام عائد کیا تھا کہ گھر کے اخراجات کے لیے دیا گیا ایک لاکھ روپے کا چیک باؤنس ہو گیا تھا۔ اس معاملے پر سماعت کے بعد علی پور کورٹ نے بدھ (20 مئی) کو فیصلہ سناتے ہوئے محمد شامی کو اس معاملے میں عائد تمام الزامات سے بری کر دیا ہے۔

واضح رہے کہ ہندوستانی تیز گیند باز محمد شامی اور ان سے الگ رہ رہی اہلیہ حسین جہاں کے درمیان طویل عرصے سے تنازعہ چل رہا ہے۔ گزشتہ سال جولائی میں کلکتہ ہائی کورٹ کے جسٹس اجے کمار مکھرجی نے حکم دیا تھا کہ محمد شامی اپنی اہلیہ اور بیٹی کے لیے 4 لاکھ روپے ماہانہ گزارہ بھتہ دیں گے۔ جس کے بعد حسین جہاں نے اس رقم کو بڑھا کر 10 لاکھ روپے کروانے کے لیے سپریم کورٹ کا رخ کیا۔

جسٹس اجے کمار مکھرجی کی طرف سے جاری کردہ حکم نامے میں کہا گیا ہے کہ ’’میرے خیال سے عرضی گزار نمبر ایک (حسین جہاں) کو ڈیڑھ لاکھ روپے اور ان کی بیٹی کو ڈھائی لاکھ روپے معاملے کا حتمی فیصلہ ہونے تک دونوں عرضی گزاروں کے لیے مالی استحکام کو یقینی بنانے کے لیے مناسب ہوں گے۔‘‘ حکم نامے میں مزید کہا گیا ہے کہ ’’حالانکہ عرضی گزار کے بچے کے سلسلے میں شوہر/مخالف فریق (شامی) کو ہمیشہ اپنی مرضی سے اس کی تعلیم اور/یا دیگر جائز اخراجات میں مذکورہ بالا رقم کے علاوہ مدد کرنے کی آزادی ہوگی۔‘‘

قابل ذکر ہے کہ محمد شامی فی الحال آئی پی ایل 2026 میں لکھنؤ سپر جائنٹس کی طرف سے کھیل رہے ہیں۔ انہوں نے موجودہ سیزن میں 12 میچوں میں 8.80 کی اکانومی سے 10 وکٹیں حاصل کی ہیں۔ آئی پی ایل سے پہلے، محمد شامی ڈومیسٹک کرکٹ میں شاندار کارکردگی دکھا کر آ رہے ہیں۔ منگل (19 مئی) کو افغانستان کے خلاف واحد ٹیسٹ میچ اور 3 میچوں کی ونڈے سیریز کے لیے ہندوستانی ٹیم کا اعلان کیا گیا ہے۔ طویل وقت سے ہندوستانی ٹیم سے باہر چل رہے محمد شامی کو ایک بار پھر ہندوستانی ٹیم میں جگہ نہیں مل پائی ہے۔