بہار کے عوام سے اکھلیش یادو کا وعدہ، ’یوپی جیسی بنیں گی سڑکیں اور 500 روپے کا ہوگا گیس سلنڈر‘

سماج وادی پارٹی کے قومی صدر اکھلیش یادو آج کل بہار اسمبلی انتخابات میں مہا گٹھ بندھن کے لیے انتخابی مہم چلا رہے ہیں، اس دوران انہوں نے اتوار کو سرائے رنجن، سیتامڑھی اور چھپرا میں تابڑتوڑ کئی عوامی جلسے کئے۔ انہوں نے سرائے رنجن سے آر جے ڈی امیدوار اروند ساہنی، سیتامڑھی سے سنیل کشواہا اور چھپرا سے کھیساری لال یادو کی حمایت میں ووٹ دینے کی اپیل کی۔ اس ریلی کے دوران اکھلیش یادو نے کہا کہ حکومت بہار میں صرف غریبی، بے روزگاری اور نقل مکانی لے کر آئی ہے۔ انہوں نے کہا کہ بی جے پی 11 سال سے مرکز میں اور 20 سال سے بہار میں ہے پھر بھی بہار میں نوجوانوں کو نوکری نہیں ملی، اس بار لوگ ان سے حساب لیں گے۔

مہاگٹھ بندھن کی اہم اتحادی سماجوادی پارٹی کے سربراہ اکھلیش یادونے کہا کہ بہار کے لوگ اب این ڈی اے حکومت کو یہاں سے ہٹانے جارہے ہیں۔ چھپرا میں کھیساری لال یادو کی حمایت میں جلسے عام کو خطاب کرتے ہوئے اکھلیش یادو نے کہا کہ چھپرا کے لوگ اس بار کھیساری لال یادو کو ووٹ دیں گے۔ تیجسوی یادو وزیر اعلیٰ بنیں گے اور نوجوانوں کو نوکریاں دیں گے، ماؤں اور بہنوں کو 2500 روپے ماہانہ، 200 یونٹ مفت بجلی اور 500 روپے میں سلنڈر دیں گے۔

انہوں نے طنزیہ انداز میں کہا کہ بی جے پی جھوٹ اور فریب کی پارٹی ہے۔ وہ ہر الیکشن میں اپنے وعدے بدلتے ہیں لیکن عوام اب ان کے دھوکے میں نہیں آئیں گے۔ جلسے میں موجود بھیڑ کی بے مثال حمایت پر اکھلیش نے کہا کہ جب تیجسوی بہار میں سڑکیں بنائیں گے تو سماجوادی پارٹی یوپی میں آگرہ-لکھنؤ ایکسپریس وے کی طرح سڑکیں جوڑے گی۔ ہم چھپرا کو لکھنؤ سے جوڑیں گے اور تیجسوی یادو پٹنہ سے، ہم مل کر یوپی اور بہار کو دہلی سے جوڑیں گے۔

سماجوادی پارٹی کے سربراہ اکھلیش یادو نے کہا کہ روزگار کبھی بھی موجودہ حکومت کے ایجنڈے میں نہیں رہا، نوکریاں کبھی ایجنڈے میں نہیں رہیں، اسی وجہ سے نقل مکانی ہو رہی ہے۔ اگر حکومت میں نوکریوں کا ایجنڈا ہوتا تو بہار میں اتنی بڑی نقل مکانی نہ ہوتی۔ آرجے ڈی کا ہر گھر روزگار کا وعدہ ممکن ہے۔