آگرہ: بس ہائی جیک کرنے والوں اور پولیس کے مابین تصادم، ایک ملزم زخمی

آگرہ: بس کو اغوا کرنے والے افراد اور پولیس کے مابین جمعرات کی صبح تصادم ہونے کی اطلاع ہے۔ پولیس کے مطابق تھانہ فتح آباد علاقہ میں چیکنگ کے دوران ملزمان نے فائرنگ شروع کر دی اور جوابی کارروائی میں ایک ملزم کے پیر میں گولی لگی ہے، جبکہ دیگر ملزم موقع سے فرار ہونے میں کامیاب ہو گئے۔

واضح رہے کہ گزشتہ روز گڑگاؤں سے مدھیہ پردیش جا رہی بس کا مسافروں سمیت کچھ افراد نے اغوا کر لیا تھا۔ بعد میں انکشاف ہوا کہ اغوا کار فنانس کمپنی کے لوگ ہیں اور بس کی قسط جمع نہ ہونے کی وجہ سے انہوں نے بس کو ضط کرنے کی کارروائی کی ہے۔ بعد میں بس کو یوپی کے اٹاوہ سے برآمد کر لیا گیا تھا۔

پولیس کے مطابق انکاؤنٹر میں زخمی ہونے والے شخص کا نام پردیپ گپتا ہے اور وہ بس ہائی جیک کرنے میں ملوث تھا۔ زخمی پردیپ کو پولیس کی طرف سے علاج کے لئے اسپتال میں داخل کرایا گیا ہے۔ پولیس کے اعلی افسران اور کرائم برانچ کی ٹیم ملزم سے پوچھ گچھ کر رہی ہے اور دیگر ملزمان کی تلاش کی جا رہی ہے۔

واضح رہے کہ گزشتہ روز علی اصبح 3 بجے گڑگاؤں سے جھانسی، چھتر پور، پنّا کے لئے 34 مسافروں کو لے کر روانہ ہونے والی بین ریاستی پرائیویٹ بس کو آگرہ کے جنوبی بائی پاس کے آگے کچھ لوگوں نے اوور ٹیک کر کے اپنے قبضہ میں لیا تھا۔ کار سوار لوگوں نے کہا کہ وہ بس کو لے کر جا رہے ہیں۔ انہوں نے ڈرائیور اور کنڈکٹر کو اپنے ساتھ کار میں بیٹھا لیا اور ایک شخص بس کو چلا کر لے گیا۔ بس مسافروں کو اس کی کوئی اطلاع نہیں تھی، بعد میں بس کے مسافروں کو اتار کر دوسری بس کے ذریعے جھانسی بھیجا گیا۔