مدر ڈیری کے بعد امول نے بھی دیا عوام کو جھٹکا، دودھ کی قیمتوں میں 4 سے 5 فیصد اضافہ

ملک میں مہنگائی کے درمیان دودھ صارفین کو ایک اور جھٹکا لگا ہے۔ مدر ڈیری کے بعد اب امول نے بھی اپنے دودھ کی قیمتوں میں اضافہ کرنے کا اعلان کر دیا ہے۔ گجرات کوآپریٹو ملک مارکیٹنگ فیڈریشن (جی سی ایم ایم ایف) نے امول کے تازہ پیک دودھ کی قیمتوں میں تقریباً 4 سے 5 فیصد تک اضافہ کرنے کا فیصلہ کیا ہے۔ نئی قیمتیں 12 نومبر 2026 سے ملک بھر کے اہم بازاروں میں نافذ ہو جائیں گی۔ اس فیصلے کے بعد عام صارفین کو روزمرہ استعمال ہونے والے دودھ کے لیے پہلے سے زیادہ رقم خرچ کرنی پڑے گی۔

کمپنی کی جانب سے جاری تفصیلات کے مطابق، امول کے مقبول ترین ویرینٹ امول تازہ ٹونڈ ملک (3 فیصد چکنائی) کی قیمت میں 2 روپے فی لیٹر کا اضافہ کیا گیا ہے، یہ تقریباً 3.3 فیصد اضافہ ہے۔ اسی طرح امول گولڈ (6 فیصد چکنائی) اب 4 روپے فی لیٹر مہنگا ملے گا، جس کی قیمت میں تقریباً 5.5 فیصد اضافہ کیا گیا ہے۔

جی سی ایم ایم ایف کے مطابق دودھ کی قیمتوں میں اضافے کی بنیادی وجہ پیداوار اور پروسیسنگ پر آنے والی لاگت میں مسلسل اضافہ ہے۔ گزشتہ ایک سال کے دوران سبز اور خشک چارے کے ساتھ مویشیوں کی خوراک میں استعمال ہونے والی تیل کی کھلی، مکئی اور شیرے جیسی اشیا کی قیمتوں میں نمایاں اضافہ ہوا ہے۔ اس کے علاوہ دودھ کی پیکنگ میں استعمال ہونے والی فلم اور ایندھن بھی مہنگے ہوئے ہیں۔

کمپنی کا کہنا ہے کہ گجرات سمیت ملک کے کئی حصوں میں کم اور غیر یکساں بارش کے سبب مویشی پالنے والے کسانوں کو بھی مشکلات کا سامنا کرنا پڑ رہا ہے۔ ایسے حالات میں دودھ پیدا کرنے والے کسانوں کو مناسب قیمت فراہم کرنا ضروری ہوگیا ہے۔ امول کے مطابق، گزشتہ ایک سال کے دوران اس سے وابستہ رکن دودھ یونینوں نے کسانوں سے دودھ کی خریداری کی قیمتوں میں 4 سے 5 فیصد تک اضافہ کیا ہے۔ اب کسانوں کو مزید بہتر ادائیگی یقینی بنانے کے مقصد سے خوردہ قیمتوں میں بھی نظرثانی کی گئی ہے۔

جی سی ایم ایم ایف نے بتایا کہ امول کے کوآپریٹو نظام کے تحت صارفین سے حاصل ہونے والی آمدنی کا تقریباً 80 فیصد حصہ ملک کے 36 لاکھ دودھ پیدا کرنے والے کسانوں کو واپس کیا جاتا ہے۔ کمپنی کے مطابق، خوردہ قیمتوں میں اضافے کا بڑا حصہ بھی کسانوں تک پہنچے گا، جس سے انہیں مالی مدد ملے گی اور دودھ کی پیداوار بڑھانے کی حوصلہ افزائی ہوگی۔

واضح رہے کہ اس سے پہلے مدر ڈیری نے بھی اپنے دودھ کی قیمتوں میں 2 سے 4 روپے فی لیٹر تک اضافے کا اعلان کیا تھا۔ اس کی نئی قیمتیں بھی 12 نومبر سے نافذ ہورہی ہیں۔ ایسے میں امول کے تازہ فیصلے نے دودھ صارفین کی پریشانی مزید بڑھا دی ہے۔