کینسر سرجری کے بعد اداکارہ دیپیکا ککڑ نے کہا ’میری پوری دنیا ہی بدل گئی‘

اپنی اداکاری کے ذریعے ٹیلی ویژن کی دنیا میں اہم مقام حاصل کرنے والی دیپیکا ککڑ نے اپنی صحت کے حوالے سے گزشتہ دنوں کافی مشکلات کا سامنا کیا۔ کینسر کی تشخیص ہونے اور اس کے بعد علاج کے دوران اکثر دیپیکا اور ان کے شوہر شعیب کافی پریشانی میں رہے۔ حال ہی میں اداکارہ نے بھارتی سنگھ اور ہرش کے ساتھ ایک پوڈ کاسٹ میں اپنے اس سفر کے بارے میں کھل کر بات کی، جس میں کینسر کی تشخیص اور سرجری کروانے کے فیصلے کے بارے میں تفصیل سے بتایا۔ اس دوران دیپیکا نے معیاری صحت کی دیکھ بھال اور علاج کے لیے سبھی متعلقین کا شکریہ ادا کیا۔

دیپیکا ککڑ نے کہا کہ میری پوری سرجری کے تجربے کے بعد میں بہت شکر گزار ہوں، مجھے لگتا ہے کہ میری پوری زندگی ہی بدل گئی ہے۔ میرے چاروں طرف پیار کرنے والے لوگ ہیں۔ میرے پاس ایک خوشحال کنبہ، کھانا اور گھر ہے۔ بہت سارے لوگ ہیں جو جدوجہد کر رہے ہیں اور ان لوگوں کے لیےعلاج بھی بڑی چیز ہوتی ہے۔ یہ احساس میرے لیے بہت بڑا ہے اور مجھے اسپتال میں رہتے ہوئے جو پیارملا، اسے الفاظ میں بیان نہیں کیا جاسکتا ہے۔

حال ہی میں دیپیکا کو دوبارہ اسپتال جانا پڑا تھا۔ اس دوران انہوں نے اپنے مداحوں کے ساتھ ایک اپ ڈیٹ شیئر کیا تھا۔ دیپیکا نے کہا کہ معمول پر آنے کے بعد بھی زندگی میں ایک خوف رہتا ہے۔ اداکارہ نے کہا کہ میں یہ بات آپ سب کے ساتھ شیئر کرنا چاہتی ہوں، میں جانتی ہوں کہ مجھ سے زیادہ مشکل حالات کا سامنا کرنے والے بہت سے لوگ ہیں، یہاں تک کہ ان کے خاندان بھی مشکل وقت سے گزر رہے ہیں۔ میں صرف اتنا کہنا چاہتی ہوں کہ ہمت نہ ہاریں، ہار مت مانیئے، زندگی کا انتخاب کریں، خوشیوں کا انتخاب کریں، حالات کا مضبوطی سے سامنا کریں، اپنے بھگوان پر یقین رکھیں۔

غور طلب ہے کہ دیپیکا کو چند ماہ قبل اسٹیج 2 لیور کینسر کا پتا چلا تھا۔ دیپیکا نے ممبئی کے کوکیلا بین اسپتال میں اپنا آپریشن کروایا۔ علاج کے بعد دیپیکا نے کہا تھا کہ ان کے پیٹ سے ٹیومر نکال دیا گیا ہے اور ان کا مزید علاج جاری ہے۔ دیپیکا تقریباً11 دنوں تک اسپتال میں داخل رہی تھیں۔