پلوامہ میں دہشت گردوں کے ساتھ مڈبھیڑ جاری، 4 جوان شہید 

گزشتہ ہفتہ پلوامہ میں دہشت گردوں نے ایک خود کش حملہ میں سی آر پی ایف کے چالیس جوان شہید کر دئے تھے اس کے بعد سے سلامتی دستوں نے اپنی کارروائی تیز کر دی ہے ۔ خبر ہے کہ آج صبح پلوامہ ضلع کے پنگلان علاقہ میں سلامتی دستوں اور دہشت گردوں کے درمیان مڈبھیر جاری ہے جس میں خبر ملنے تک چار جوان شہید ہو گئے ہیں۔ یہاں د و سے تین دہشت گردوں کے چھپے ہونے کا شک ہے ۔ سلامتی دستوں نے آس پاس کے علاقوں کی گھیرا بندی کر دی ہے اور سرچ مہم تیز کر دی ہے ۔

واضح رہے کہ چودہ فروری کو پلوامہ میں ہی سی آر پی ایف کے ایک قافلہ پر خود کش حملہ ہوا تھا اور اس دہشت گردانہ حملے میں چالیس جوان شہید ہو گئے تھے اور متعدد زخمی ہو گئے تھے ۔اس حملہ کے بعد سے فوج اور سلامتی دستے پوری طرح سے حرکت میں ہیں ۔اس حملہ کی ذمہ داری پاکستانی دہشت گرد تنظیم جیش محمد نے لی ہے ۔ پاکستانی تنظیم کے ذریعہ اس حملہ کی ذمہ داری لینے کے بعد سے ہندوستان نے پاکستان کو عالمی سطح پر الگ تھلگ کرنے کی کوششیں تیز کر دی ہیں۔ دو روز قبل ہی پاکستان کو جو واجپئی حکومت نے ’موسٹ فیورڈ نیشن‘ کا درجہ دیا تھا وہ واپس لے لیا ہے اور اب پاکستان سے آنے والی اشیا پر امپورٹ ڈیوٹی دو سو فیصد کر دی گئی ہے ۔

واضح رہے اس کے ساتھ حکومت ہند نے جمو کشمیر کے علیحدگی پسند قائدین کو سیکیورٹی فراہم کی ہوئی تھی وہ بھی واپس لے لی گئی ہے ۔ جن کشمیری رہنماؤں کی سیکیورٹی واپس لی گئی ہے ان میں میر واعظ عمر فاروق، شبیر شاہ، بلال لون، حاشم قریشی، عبدل غنی بٹ اور فضل حق قریشی شامل ہیں ۔ ان کی حفاظت کے لئے ان کی رہائش گاہ پر جو گاڑیاں کھڑی تھیں ان کو ہٹا لیا گیا ہے۔