تین سالوں کے دوران ریل احاطہ میں تقریباً 30 ہزار اموات ہوئیں: انڈین ریلوے

وزارت ریل نے اپنے ایک بیان میں اس بات کا انکشاف کیا ہے کہ گزشتہ تین سالوں میں ریلوے احاطہ میں تجاوزات اور دیگر ناخوشگوار واقعات کے سبب تقریباً 29 سے 30 ہزار اموات ہوئی ہیں۔ یہ بیان اس لیے حیران کرنے والا ہے کیونکہ اس سے قبل انڈین ریلوے نے گزشتہ مالی سال میں ایک بھی موت نہ ہونے کا دعویٰ کیا تھا جس پر نیتی آیوگ نے وزارت سے سوال کیا تھا۔ اس کے جواب میں وزارت ریل نے کل اموات کی تعداد گزشتہ تین سالوں میں تقریباً 30 ہزار تک ہونے کی بات کہی۔

میڈیا ذرائع سے موصول ہو رہی خبروں کے مطابق انڈین ریلوے کی جانب سے ریلوے بورڈ کے چیئرمین وی کے یادو نے نیتی آیوگ کے چیف ایگزیکٹیو افسر (سی ای او) امیتابھ کانت کے سوالوں کا جواب دیتے ہوئے مذکورہ جانکاری دی۔ امیتابھ کانت کی طرف سے ریلوے کے ان دعووں کو سنجیدگی سے لیا گیا تھا جس میں کہا گیا تھا کہ گزشتہ سال حادثہ میں ایک بھی موت نہیں ہوئی۔ امیتابھ کانت نے اعداد و شمار کی حقیقت پر سوال کرتے ہوئے کہا تھا کہ ممبئی سَب اَربن ڈویژن پر ہی ہر سال ہزاروں اموات ہو رہی ہیں۔

نیتی آیوگ کے سی ای او کا کہنا ہے کہ ریل حادثات صرف ٹرین سے متعلق حادثات یعنی کہ ٹرین کے پٹری سے اترنے کے واقعات سے جڑے ہوتے ہیں جب کہ تجاوزات کے سبب ہونے والی اموات کو انسانی غلطی کی شکل میں شمار کیا جاتا ہے۔ ان کا کہنا تھا کہ ٹرین سے یا پلیٹ فارم سے گر کر یا پٹری پر گرنے سے بھی موت ہوتی ہے، جسے آفیشیل طور پر درج کیا جانا چاہیے۔

ریلوے بورڈ کے چیئرمین وی کے یادو نے اس سلسلے میں پریس کانفرنس کر کہا کہ انڈین ریلوے اس کے احاطہ میں ہوئی ہر ایک موت کا ریکارڈ رکھتا ہے۔ ریلوے انھیں تین درجات میں تقسیم کرتا ہے جو ٹرین حادثہ، تجاوزات اور ناخوشگوار واقعات کے تحت درج کرتا ہے۔ بعد ازاں وی کے یادو نے واضح کیا کہ گزشتہ تین سالوں میں تجاوزات اور ناخوشگوار حادثات کے سبب 29 سے 30 ہزار لوگوں کی موت ہوئی ہے اور تفصیلی رپورٹ جلد نیتی آیوگ کے سامنے پیش کیا جائے گا۔