ایم پی میں ریت مافیہ کے خلاف اسٹنگ آپریشن کرنے والے صحافی کا قتل!

مدھیہ پردیش کے بھنڈ ضلع میں ٹرک سے کچل کر صحافی کی موت کے معاملے میں ایس پی نے ایس آئی ٹی تشکیل دے دی ہے جو پورے معاملے کی جانچ کرے گی۔ اس درمیان ٹرک سے کچل کر صحافی کی موت کا پورا واقعہ سی سی ٹی وی فوٹیج میں سامنے آیا ہے۔ اس میں صاف نظر آ رہا ہے کہ صحافی سندیپ شرما سڑک کنارے چل رہے ہیں اور بے قابو ٹرک انھیں کچلتا ہوا آگے بڑھ جاتا ہے۔

پولس کے مطابق صحافی سندیپ شرما سوموار کی صبح اپنی موٹر سائیکل سے کہیں جا رہے تھے۔ اسی دوران بھنڈ کوتوالی کے پاس ایک ٹرک نے انھیں کچل دیا۔ سندیپ کو حادثہ کے بعد فوراً اسپتال لے جایا گیا لیکن انھیں بچایا نہیں جا سکا۔ ٹرک کے ذریعہ سندیپ شرما کو کچلے جانے کا پورا واقعہ سی سی ٹی وی کیمرے میں قید ہو گیا ہے جس کے ذریعہ جانچ کا کام آگے بڑھایا جائے گا۔

بتایا جا رہا ہے کہ سندیپ شرما نے تقریباً ایک سال قبل ریت مافیہ اور پولس کے درمیان سانٹھ گانٹھ سے متعلق ایک اسٹنگ آپریشن کیا تھا جس سے ریت مافیہ کافی ناراض تھے۔ اسٹنگ آپریشن میں ایک پولس اہلکار کو ریت مافیہ سے رشوت لیتے ہوئے دکھایا گیا تھا۔ خبروں کے مطابق سندیپ نے پورے معاملے کی شکایت وزیر اعظم نریندر مودی اور وزیر اعلیٰ شیو راج سنگھ سے بھی کی تھی۔