دہلی اقلیتی کانگریس کی سیاسی بیداری مہم کے تحت سیلم پور اسمبلی حلقہ میں شاندار جلسہ منعقد

نئی دہلی: راجدھانی دہلی میں کانگریس پارٹی کو زمینی سطح پر مزید مضبوط کرنے کے لیے دہلی پردیش کانگریس کمیٹی کا اقلیتی شعبہ پوری طرح سرگرم نظر آ رہا ہے۔ دہلی اقلیتی کانگریس کی ’سیاسی بیداری مہم‘ کا باقاعدہ آغاز بابر پور ضلع کے سیلم پور اسمبلی حلقہ میں ہوا۔ نو تقرر ضلع چیئرمین کمل غازی نے ایک بڑے جلسہ کا انعقاد کیا، جہاں کانگریس کے سینکڑوں کارکنان کی موجودگی نے ماحول کو جوش اور توانائی سے بھر دیا۔

جلسہ میں مہمان خصوصی کے طور پر دہلی اقلیتی شعبہ کے چیئرمین عبد الواحد قریشی، انچارج شبلی منظور، بابر پور ضلع کانگریس کمیٹی کے صدر راج کمار جین نے شرکت کی۔ قبل ازیں سبھی مہمان خصوصی کا کمل غازی اور ان کی پوری ٹیم نے پھولوں کی مالا پہنا کر والہانہ استقبال کیا۔ تاہم جلسہ کا آغاز ’کانگریس پارٹی زندہ آباد‘، ’ترقی و خوشحالی کیلئے کانگریس ضروری ہے‘ کے فلک شگاف نعروں سے ہوا۔

اس موقع پر اپنے خطاب میں عبد الواحد قریشی نے کہا کہ دہلی میں اب عوام کانگریس کو امید بھری نگاہ سے دیکھ رہے ہیں۔ اس کی بنیادی وجہ یہ ہے کہ موجودہ دور میں جن لوگوں نے اقتدار میں آنے سے پہلے عوام سے خوشنما وعدے کئے تھے وہ نہ تو پورے ہوئے ہیں اور نہ ان کو پورا ہونے کیلئے کوئی ماحول نظر آ رہا ہے۔ انہوں نے کہا کہ اگر اقتدار میں کانگریس پارٹی آئے گی تو ہمیں خوشحالی، ترقی اور آپسی بھائی چارے والا ماحول ملے گا۔ آج نفرت کی سیاست نے ملک کی جڑوں کو کافی کمزور کر دیا ہے اور اس بات کو ہر کس و ناکس اچھی طرح سمجھ رہا ہے۔ عبد الواحد قریشی نے کہا کہ ہمارے لیڈر راہل گاندھی جی ملک کے مفاد میں بات کرتے ہیں اور ہم بھی آپ لوگوں کے درمیان کانگریس پارٹی کی فکر لے کر آئے ہیں۔ انہوں نے مزید کہا کہ قومی اقلیتی شعبہ کے چیئرمین اور رکن پارلیمنٹ عمران پرتاپ گڑھی کی ہدایت و رہنمائی میں پوری دہلی میں سیاسی بیداری مہم چلائی جائے گی جس میں عوام کو بیدار کیا جائے گا، جس کا آغاز آج سیلم پور سے ہو چکا ہے۔

انچارج شبلی منظور نے اپنے پیغام میں کہا کہ سیلم پور کے عوامی جوش و خروش سے صاف ظاہر ہوتا ہے کہ لوگ تیزی سے کانگریس پارٹی میں شامل ہو رہے ہیں۔ اس کی پالیسیوں اور عوام کے لیے اس کی جدوجہد سے متاثر ہو کر آنے والا وقت دہلی اور ملک بھر میں کانگریس پارٹی کا ہے اور اقلیتی شعبہ مسلسل اس کی شرکت کو یقینی بنا رہا ہے۔ آج سیلم پور میں منعقد ہوا یہ جلسہ ایک پیغام ہے کہ قومی چیئرمین عمران پرتاپ گڑھی کی رہنمائی میں دہلی کانگریس کا اقلیتی شعبہ نئی بلندیوں کو چھو رہا ہے۔

نو تقرر ضلع چیئرمین کمل غازی نے کا کہنا تھا کہ مجھے جو ذمہ داری کانگریس کے اعلی کمان نے سونپی ہے اس کو میں بحسن و خوبی ادا کروں گا اور عوام تک کانگریس پارٹی کے پیغام کو پہنچانے کا کام کروں گا۔ اس موقع پر انچارج شبلی منظور، شریک انچارج الطاف حسین، ریاستی چیئرمین عبدالواحد قریشی، بابر پور ضلع کانگریس کے صدر راج کمار جین، اے آئی سی سی ترجمان اجے اپادھیائے، کسان کانگریس کے صدر سائی جی، ارون ترپاٹھی، محمد اسماعیل، فہیم خان اور کئی دیگر سینئر عہدیدار و ساتھی بڑی تعداد میں موجود تھے۔