بھونیشور نے آخری گیند پر وکٹ لے کر حیدرآباد  کوفتح دلائی

سن رائزرس حیدرآباد یعنی ایس آر ایچ نے راجستھان رائلز کو سنسنی خیز مقابلے میں 1 رن سے شکست دی ۔ پہلے کھیلتے ہوئے سن رائزرس حیدرآباد نے نتیش ریڈی اور ٹریوس ہیڈ کی نصف سنچریوں کی بدولت 201 رنز بنائے تھے۔ ہدف کا تعاقب کرتے ہوئے راجستھان رائلز  یعنی آر آر کی شروعات بہت خراب رہی کیونکہ ٹیم نے 1 رن کے اسکور پر جوس بٹلر اور کپتان سنجو سیمسن کی وکٹیں گنوا دیں۔ یشسوی جیسوال اور ریان پراگ کے درمیان 133 رنز کی شراکت نے آر آر کو فتح کے قریب پہنچا دیا تھا، اس کے باوجود ٹیم فتح درج نہیں کر سکی۔ یشسوی جیسوال نے 40 گیندوں میں 67 رنز بنائے، اس دوران انہوں نے 7 چوکے اور 2 چھکے لگائے۔ ریان پراگ نے 49 گیندوں پر 77 رنز کی شاندار اننگز کھیلی جس کے دوران انہوں نے 8 چوکے اور 4 چھکے لگائے۔

ابتدائی 2 وکٹ گرنے کے بعد بھی راجستھان رائلز نے پاور پلے اوورز میں 2 وکٹوں کے نقصان پر 60 رنز بنائے تھے۔ جیسوال اور ریان پراگ کی جوڑی گیند بازوں کو خوب مار رہی تھی۔ اس دوران 14ویں اوور میں جیسوال 67 رنز بنا کر ٹی نٹراجن کی گیند پر آؤٹ ہو گئے۔ لیکن پراگ ابھی تک کریز پر تھے۔ راجستھان کا اسکور 15 اوور میں 157 رنز تھا اور ٹیم کو آخری 5 اوور میں 45 رنز درکار تھے۔ 16ویں اوور میں ریان پراگ بھی آؤٹ ہو گئے جس کی وجہ سے میچ اٹکنے لگا۔ ایس آر ایچ کو آخری 2 اوورز میں 20 رنز درکار تھے اور ابھی 5 وکٹیں باقی تھیں۔ پہلے شمرون ہیٹمائر اور پھر دھرو جریل کی وکٹیں گرتے ہی میچ میں جان آگئی۔

راجستھان کو آخری 6 گیندوں میں 13 رنز بنانے تھے۔ آخری اوور کی پہلی گیند پر ایک رن اور دوسری گیند پر ڈبل رن آیا۔ تیسری گیند پر چوکا لگتے ہی ہزاروں شائقین خوشی سے اچھل پڑے اور اگلی گیند پر بھی 2 رنز بنائے۔ 5ویں گیند پر بھی روی چندرن ایشون اور روومین پاول ڈبل رن کے لیے بھاگ رہے تھے، پاول نے کسی طرح دوسرا رن مکمل کیا۔ معاملہ اس مرحلے تک پہنچ گیا تھا کہ راجستھان کو 1 گیند میں 2 رنز درکار تھے۔ روومین پاول بھونیشور کمار کے اوور کی آخری گیند پر ایل بی ڈبلیو آؤٹ ہوئے جس کی وجہ سے ایس آر ایچ نے 1 رن سے اپنی جیت یقینی بنائی۔

بھونیشور کمار نے پہلے ہی اوور میں جوس بٹلر اور سنجو سیمسن کی وکٹیں لے کر ایس آر ایچ کی بولنگ کو مضبوط آغاز فراہم کیا۔ لیکن اس کے بعد وکٹوں کا قحط پڑ گیا۔ بھونیشور کمار نے 3، پیٹ کمنز اور ٹی نٹراجن نے 2،2 وکٹیں حاصل کیں۔ مارکو جانسن نے بغیر کوئی وکٹ لیے 44 رنز دیے اور جے دیو انادکٹ نے 2 اوور میں 23 رنز دیے۔ 19ویں اور 20ویں اوور میں پیٹ کمنز اور بھونیشور کمار کی شاندار گیند بازی نے حیدرآباد کو سنسنی خیز فتح دلائی۔