آئی پی ایل 2020: ایک گیند مس کرنے پر یوراج سنگھ نے تیوتیا کو کہا شکریہ

نئی دہلی: سابق ہندوستانی آل راؤنڈر اور سکسر کنگ کے نام سے معروف یوراج سنگھ نے راجستھان رائلز کے بیٹس مین راہل تیوتیا کے چھ گیندوں میں پانچ چھکے مارنے پر کہا ہے کہ ایک گیند مس کرنے کا شکریہ تیوتیا۔

تیوتیا نے کنگز الیون پنجاب کے خلاف شیلڈن کوٹریل کے خلاف ایک اوور میں پانچ چھکے لگائے تھے۔ انہوں نے 18ویں اوور کی پہلی چار گیندوں پر چھکے مارے، لیکن پانچویں گیند مس کرگئے۔ تاہم انہوں نے چھٹی گیند پر ایک اور چھکا لگایا اور کوٹریل کے اوور میں 30 رنز بنائے۔ میچ میں اوور بڑے اسکور کے ساتھ فیصلہ کن ثابت ہوا اور راجستھان نے یہ میچ چار وکٹوں سے جیت لیا۔

یوراج نے کہا کہ ہنسمکھ چہرے کے تیوتیا بھائی ایک گیند مس کرنے پر آپ کا شکریہ۔ یہ واقعتاً ایک زبردست میچ تھا۔ اس عظیم فتح کے لئے راجستھان کو مبارکباد۔ مینک اگروال اور سنجو سیمسن نے بھی عمدہ کھیل کھیلا۔ قابل ذکر ہے کہ یوراج نے 2007 کے ٹی ٹوئنٹی ورلڈ کپ میں انگلینڈ کے فاسٹ بولر اسٹورٹ براڈ کے ایک اوور میں چھ چھکے لگائے تھے۔