آئی پی ایل 2020: بین اسٹوکس حیدرآباد کے خلاف راجستھان ٹیم میں شامل ہوسکتے ہیں

دبئی: راجستھان رائلس کے اسٹار آل راونڈر بین اسٹوکس سن رائزرس حیدرآباد کے خلاف اتوار کے روز مقابلے کے لئے ٹیم میں شامل ہوسکتے ہیں۔ اسٹوکس اپنے والد کی بیماری کے سبب نیوزی لینڈ میں تھے اور آئی پی ایل کے شروعات میں ٹیم میں شامل نہیں ہوسکے تھے لیکن کچھ روز قبل وہ آئی پی ایل میں حصہ لینے کے لئے یو اے ای پہنچ گئے ہیں کورونا سے متعلق رہنما خطوط کے تحت کوارنٹین میں رہ رہے ہیں۔

راجستھان کی ٹیم نے بتایا کہ اسٹوکس کی کوارنٹین کی مدت سنیچر کے روز ختم ہورہی ہے جس کے بعد وہ ٹریننگ میں واپسی کرسکیں گے۔ اس طرح وہ حیدرآباد کے خلاف مقابلے کے لئے دستیاب ہوسکتے ہیں۔ اب یہ دیکھنا دلچسپ ہوگا کہ مسلسل شکست کا سامنا کر رہی راجستھان کی ٹیم انہیں اتوار کے روز مقابلے میں اتارتی ہے یا نہیں۔

اسٹوکس گیند اور بلے دونوں سے ٹیم کے لئے فائدہ مند ثابت ہوسکتے ہیں۔ اسٹوکس دنیا کے سب سے خطرناک آل راونڈروں میں سے ایک ہیں۔ اسٹوکس نے 26 ٹی 20 میچوں میں 305 رنز بنائے ہیں اور 14 وکٹیں حاصل کی ہیں۔ انہوں نے آئی پی ایل کے 34 میچوں میں 22.67 کی اوسط سے 635 رنز بنائے ہیں اور یہاں ان کا سب سے زیادہ اسکور ناٹ آوٹ 103 رن کا ہے۔ انہوں نے آئی پی ایل میں 26 وکٹیں حاصل کی ہیں۔