عمرہ کرنے گئیں 3 پاکستانی بزرگ خواتین کو سعودی عرب نے کیوں سنائی 25-25 سال کی سزا؟

پاکستان سے 5 افراد عمرہ کرنے کے لیے سعودی عرب گئے تھے، جن میں 3 بزرگ خواتین بھی شامل ہیں۔ اس خبر نے لوگوں کو حیران کر دیا ہے کہ تقریباً 70 سال کی تینوں خواتین کو سعودی عرب میں 25 سال قید کی سزا سنا دی گئی ہے۔ انھیں سزا نشیلی اشیا کی اسمگلنگ معاملہ پر سنائی گئی ہے، لیکن خواتین کا کہنا ہے کہ انھیں اس کے بارے میں کچھ بھی معلوم نہیں۔ دراصل پاکستان سے سعودی عرب جانے والے ان افراد کے سامان میں منشیات پائی گئیں، جس کے بعد ان پر منشیات اسمگلنگ کا مقدمہ چلایا گیا۔ ان خواتین کے نام زیارت بی بی، انور بی بی اور شمیم بی بی ہیں۔

بتایا جاتا ہے کہ 5 افراد 2024 میں عمرہ کے لیے سعودی عرب روانہ ہوئے تھے۔ پنجاب کے ضلع فیصل آباد کی تحصیل جڑانوالہ کے ایک گاؤں سے یہ خواتین اپنے قریبی رشتہ دار نیر عباس کے ساتھ قریب کے ایک گاؤں پہنچیں، جہاں مسجد کے امام محمد ریاض بھی اپنی اہلیہ کے ساتھ اسی سفر میں شامل ہونے والے تھے۔

کہا جا رہا ہے کہ ان پانچوں کے عمرہ کا انتظام مقامی زمیندار صدام حسین نے کیا تھا۔ اس نے نہ صرف عمرہ کا پورا خرچ اٹھایا بلکہ اپنے خرچ پر پانچوں افراد کو اسلام آباد ایئرپورٹ تک بھی بھجوایا۔ تاہم پاکستان سے روانگی کے محض ایک ہفتہ بعد ہی ان پانچوں کے اہل خانہ کو سعودی عرب میں ان کی گرفتاری کی خبر ملی، جس سے وہ حیران رہ گئے۔ تشویش اس وقت مزید بڑھ گئی جب تقریباً 5 ماہ بعد (17 فروری 2025 کو) ایک سعودی عدالت نے 3 خواتین سمیت تمام 5 افراد کو منشیات (ڈرگ اسمگلنگ) کے الزام میں 25 سال قید کی سزا سنا دی۔ متاثرین کا کہنا ہے کہ ان لوگوں کا سامان بدل دیا گیا تھا اور ان کے ساتھ ایسا سامان رکھ دیا گیا جس میں منشیات چھپائی گئی تھیں۔ یہ معاملہ تقریباً ایک سال پرانا ہے، لیکن اب سرخیوں میں ہے۔

زیارت بی بی کے بیٹے ابرار حسین نے بتایا کہ وہ اپنی والدہ کو رخصت کرنے کے لیے اسلام آباد ایئرپورٹ جانا چاہتے تھے، لیکن صدام حسین نے ان سے کہا کہ آپ لوگ اسلام آباد آنے جانے کا خرچ کیوں اٹھانا چاہتے ہیں۔ ابرار کے مطابق صدام حسین نے کہا کہ اگر ہم انہیں ثواب کی نیت سے عمرہ کے لیے بھیج رہے ہیں تو ہم اسلام آباد میں انہیں کسی بھی قسم کی پریشانی نہیں ہونے دیں گے۔ ابرار نے یہ بھی بتایا کہ یہ تسلی بخش باتیں سن کر ان کی تشویش دور ہو گئی۔ گاؤں میں صدام حسین شاہ ایک بڑا زمیندار تھا اور مقامی لوگوں کے مطابق وہ ہر سال ثواب کے طور پر 5-4 افراد کو عمرہ پر بھیجتا تھا۔

ابرار کے مطابق کچھ ہی دیر بعد اسراراللہ نامی ایک شخص ان پانچوں کو گاڑی میں لے کر اسلام آباد روانہ ہوا، جہاں انہیں ایک ہوٹل میں ٹھہرایا گیا۔ بعد میں پانچوں نے اپنے اپنے گھروں پر فون کر کے بتایا کہ وہ خیریت سے اسلام آباد پہنچ گئے ہیں اور اگلے دن جدہ کے لیے روانہ ہوں گے۔ معاملے کی تفتیش کرنے والے ایک افسر اور ابرار کے مطابق اگلی صبح ان لوگوں کی ملاقات گل خان نامی شخص سے ہوئی، جسے صدام حسین کا دوست بتایا گیا۔

ابرار بتاتے ہیں کہ اس دن ان کی والدہ نے فون پر کہا تھا کہ گل خان نے دعویٰ کیا کہ اسے 20 سال بعد اولاد ہوئی ہے اور اسی خوشی میں وہ عمرہ پر جانے والوں کی خدمت کرنا چاہتا ہے۔ گل خان نے ان پانچوں کو نئے جوتے، کپڑے اور کچھ تحفے کے پیکٹ دیے۔ ابرار کے مطابق ان کی والدہ نے بتایا کہ گل خان نے کہا کہ جوتے اور کپڑے آپ کے لیے ہیں اور تحفے کے پیکٹ آپ جدہ ایئرپورٹ پر میرے ایک دوست کو دے دیجیے گا۔

ابرار کہتے ہیں کہ ابتدا میں ان پانچوں نے یہ سامان لینے سے انکار کیا، لیکن گل خان نے انہیں فون پر صدام حسین سے بات کروائی۔ صدام حسین نے سوال کیا کہ ہم آپ کے لیے اتنا کچھ کر رہے ہیں تو آپ میرے دوست کے لیے اتنا بھی نہیں کر سکتے؟ ابرار کے مطابق ان کی والدہ نے بتایا کہ فلائٹ کا وقت قریب تھا اور بحث کا وقت نہیں تھا۔ اس کے بعد اگلی صبح یہ پانچوں افراد صبح 6 بج کر 10 منٹ پر ایئر سیال کی فلائٹ نمبر پی ایف-718 سے جدہ کے لیے روانہ ہو گئے۔

ابرار حسین کا کہنا ہے کہ جدہ پہنچنے کے بعد ان کی والدہ زیارت بی بی نے چند دن تک کوئی رابطہ نہیں کیا، جس سے وہ پریشان ہو گئے۔ تقریباً ایک ہفتہ بعد 6 اکتوبر کی صبح ان کی والدہ کا فون آیا اور انہوں نے بتایا کہ وہ جیل سے بات کر رہی ہیں۔ انہوں نے کہا کہ جو تحفے کے پیکٹ اور جوتے انہیں دیے گئے تھے، ان میں نشہ آور مادہ (آئس) چھپا ہوا تھا۔ زیارت بی بی نے یہ بھی مطلع کیا کہ جدہ ایئرپورٹ پر تلاشی کے دوران تمام 5 افراد کے سامان سے مجموعی طور پر تقریباً 5.5 کلو منشیات برآمد ہوئیں، جس کے بعد انہیں وہیں حراست میں لے لیا گیا۔

یہ معاملہ پیش آنے کے بعد خاندان نے صدام حسین شاہ سے رابطہ کیا، جس نے پہلے لاعلمی ظاہر کی اور یقین دلایا کہ وہ سب کو رہا کروا لے گا۔ لیکن کچھ ہی عرصہ بعد وہ خود غائب ہو گیا۔ بعد ازاں خفیہ ایجنسیوں اور ایف آئی اے نے تفتیش شروع کی۔

دوسری طرف 17 فروری 2025 کو سعودی عدالت نے پانچوں افراد کو منشیات اسمگلنگ کے مقدمے میں 25 سال قید کی سزا سنائی۔ پاکستان کی ایف آئی اے نے بھی تفتیش کے بعد صدام حسین شاہ، اسراراللہ اور گل نواز خان کے خلاف مقدمہ درج کیا۔ اسراراللہ کو گرفتار کر لیا گیا، صدام حسین کو بعد میں حراست میں لیا گیا، جبکہ گل نواز خان کو مفرور قرار دیا گیا ہے۔ یہ مقدمہ اس وقت ایف آئی اے کی خصوصی عدالت، فیصل آباد میں زیر سماعت ہے۔

ملزم صدام حسین شاہ کے وکیل نے لاہور ہائی کورٹ میں ضمانت کی درخواست دائر کی ہے۔ درخواست میں کہا گیا ہے کہ صدام حسین بے گناہ ہے اور اس کا منشیات اسمگلنگ سے متعلق کوئی سابقہ ریکارڈ نہیں ہے۔ درخواست کے مطابق صدام حسین پہلے بھی کئی لوگوں کو عمرہ کے لیے بھیج چکا ہے اور ان سے کوئی رقم نہیں لی گئی تھی۔ وہ تمام افراد عمرہ ادا کر کے بحفاظت واپس لوٹ آئے تھے۔ صدام حسین کا کہنا ہے کہ پاکستان سے سعودی عرب جاتے اور واپس آتے وقت مسافروں کی مکمل جانچ پڑتال ہوتی ہے اور اسے اس بات کی کوئی اطلاع نہیں کہ منشیات کب اور کہاں ڈالی گئیں۔