جنوبی کوریا: ہیلووین پارٹی میں بھگدڑ مچنے سے ہلاکتوں کی تعداد 150 سے متجاوز

سیول: جنوبی کوریا کے دارالحکومت سیول کے وسطی علاقے میں بھگدڑ مچنے سے ہلاکتوں کی تعداد بڑھ کر 151 ہو گئی ہے، جبکہ 150 سے زیادہ افراد زخمی ہوئے ہیں۔

بھگدڑ کا یہ واقعہ ہفتہ کے روز مقامی وقت کے مطابق رات 10 بج کر 20 منٹ پر پیش آیا۔ یونگسن فائراسٹیشن کے سربراہ چوئی سنگ بیوم نے بتایا کہ ہیلووین پارٹی کے دوران میں لوگوں کی ایک بڑی تعداد ہملٹن ہوٹل کے نزدیک واقع ایک تنگ گلی سے گزر رہی تھی۔ اس دوران میں ان میں دھکم پیل شروع ہو گئی اور بھگدڑ مچ گئی۔

حکام کے مطابق سیول کے علاقے اتائی ون میں بھگدڑ کے اس واقعہ میں ہلاکتوں کی تعداد میں اضافے کا اندیشہ ہے کیونکہ بہت سے شدید زخمیوں کی حالت تشویش ناک ہے اور ابھی امدادی سرگرمیاں جاری ہیں۔ جنوبی کوریا کی نیشنل فائر ایجنسی کے ایک عہدیدار مون ہیون جو نے کہا کہ ’’علاقے میں ابھی تک افرا تفری کا عالم ہے اور ہم زخمی ہونے والے افراد کی صحیح تعداد کا پتا لگانے کی کوشش کر رہے ہیں۔‘‘

جائے وقوعہ کے نزدیک واقع اسپتالوں میں منتقل کئے گئے زخمی افراد میں 19 غیر ملکی بھی شامل ہیں۔ رپورٹ کے مطابق غیر ملکی افراد کا تعلق ایران، ازبیکستان، چین اور ناروے سے تھا۔ جنوبی کوریا کے صدر یون سک یول نے حادثے کی اطلاع ملتے ہی سینیر معاونین کے ساتھ ایک ہنگامی اجلاس کی صدارت کی اور علاقے میں ہنگامی طبی ٹیموں کو بھیجنے کا حکم دیا۔ حکام کا کہنا ہے کہ وہ واقعہ کی اصل وجوہ کی تحقیقات کر رہے ہیں۔