عالمی خبریں
جاپان میں ریکارڈ بارش سے تباہی، سیلاب کے باعث 8 افراد ہلاک، ہزاروں افراد محصور
جاپان کے چیبا پریفیکچر میں 12 گھنٹوں میں ریکارڈ 350 ملی میٹر بارش سے شدید سیلاب کی صورت حال پیدا ہو گئی، 8 افراد ہلاک، جبکہ ہزاروں محصور ہو گئے۔ صرف اتنا ہی نہیں 20 ہزار گھروں کو بجلی بھی میسر نہیں ہے
جاپان میں بارش / Getty Images
ٹوکیو کے مشرق میں واقع جاپان کے چیبا پریفیکچر میں ریکارڈ توڑ بارش نے بڑے پیمانے پر تباہی مچا دی، جس کے نتیجے میں کم از کم 8 افراد ہلاک اور ہزاروں افراد مختلف مقامات پر محصور ہو کر رہ گئے۔ جاپان کے سرکاری نشریاتی ادارے این ایچ کے نے جمعہ کو پولیس کے حوالے سے ہلاکتوں کی تصدیق کی۔
جاپان کی موسمیاتی ایجنسی کے مطابق جمعرات اور جمعہ کے درمیان چیبا شہر میں صرف 12 گھنٹوں کے دوران تقریباً 350 ملی میٹر، یعنی 13.7 انچ بارش ریکارڈ کی گئی۔ یہ مقدار اگست کے پورے مہینے کی اوسط بارش سے تقریباً 3 گنا زیادہ ہے۔ حکام کے مطابق 1976 میں ریکارڈ رکھنے کا سلسلہ شروع ہونے کے بعد سے چیبا میں 12 گھنٹوں کے دوران ہونے والی یہ سب سے زیادہ بارش ہے۔
شدید بارش کے پیش نظر جاپان کی موسمیاتی ایجنسی نے جمعرات کی رات سے جمعہ کی صبح تک چیبا پریفیکچر کی 22 بلدیاتی حدود میں شدید بارش کے لیے لیول فائیو کی ہنگامی وارننگ جاری کی تھی۔ یہ جاپان میں موسمیاتی خطرات کے حوالے سے سب سے بلند سطح کا انتباہ ہے۔ حکام نے شہریوں کو ’غیر معمولی شدید بارش‘ کے خطرے سے آگاہ کرتے ہوئے فوری طور پر حفاظتی اقدامات کرنے کی اپیل کی تھی۔
جاپان میں موسمیاتی انتباہی نظام میں اس سال کے شروع میں وضاحت کے لیے تبدیلی کے بعد پہلی مرتبہ لیول فائیو وارننگ جاری کی گئی۔ جمعہ کی دوپہر تک انتباہ کی سطح کم کر دی گئی، تاہم حکام نے خبردار کیا کہ بارش کا سلسلہ جاری رہنے کی توقع ہے۔
شدید بارش کے باعث چیبا میں سیلابی صورتحال پیدا ہوگئی اور کئی علاقوں میں معمولات زندگی مفلوج ہو گئے۔ سڑکوں پر کاریں اور بسیں پانی میں ڈوب گئیں، جبکہ ریلوے اسٹیشنوں اور شاپنگ سینٹروں میں بھی پانی داخل ہو گیا۔ سوشل میڈیا پر سامنے آنے والی ویڈیوز میں لوگوں کو کمر تک گہرے پانی میں چلتے ہوئے دیکھا گیا۔
چیبا شہر کے سوگا ریلوے اسٹیشن کے اطراف رات بھر تقریباً 4 ہزار افراد پھنسے رہے۔ جاپان کی سیلف ڈیفنس فورسز کے اہلکاروں کو جمعہ کی صبح وہاں پہنچایا گیا تاکہ متاثرہ افراد کو آمدورفت کی سہولت فراہم کی جا سکے۔
شدید بارش نے نقل و حمل کے نظام کو بھی بری طرح متاثر کیا۔ چیبا میں واقع ناریتا انٹرنیشنل ایئرپورٹ پر جمعرات کی رات ہزاروں مسافر پھنس گئے، کیونکہ ہوائی اڈے سے آنے اور جانے والی ٹرین سروس معطل کر دی گئی تھی۔ اگرچہ پروازیں معمول کے مطابق چلتی رہیں، لیکن جمعہ کو بھی ٹرین سروس میں خلل برقرار رہا۔
بارش کے باعث بجلی کی فراہمی بھی متاثر ہوئی۔ ٹوکیو الیکٹرک پاور کمپنی کے مطابق جمعہ کی دوپہر تک چیبا میں تقریباً 20 ہزار گھر بجلی سے محروم تھے۔
یہ شدید بارش ایسے وقت میں ہوئی ہے جب جاپان پہلے ہی رواں موسم گرما میں شدید موسمی سرگرمیوں اور ریکارڈ گرمی کا سامنا کر رہا ہے۔ چند روز قبل شدید استوائی طوفان ’چان ہوم‘ نے چیبا کے شمال میں واقع پریفیکچر میں لینڈ فال کیا تھا، جس کے بعد خطے میں موسمی حالات مزید خراب ہو گئے۔
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔