دنیا کی اہم شخصیات کے مالی رازوں سے متعلق ’پینڈورا پیپرز‘کا منظرعام پر آنے کا امکان

دنیا بھر کی اہم شخصیات کے خفیہ مالیاتی معاملات پر بڑی بین الاقوامی تحقیق مکمل ہوگئی ہے جو’پینڈورا پیپرز‘ کے نام سے جاری کئے جائیں گے۔ عالمی میڈیا سے ملنے والی رپورٹ میں بتایا گیا کہ ڈیٹا کلیکشن اور اشتراک کے حوالہ سے’ پینڈورا پیپرز‘،’ پنامہ پیپرز‘ سے بہت بڑے ہیں۔

رپورٹ کے مطابق ممکنہ طور پر یہ دنیائے صحافت کی تاریخ میں کی جانے والی اب تک کی سب سے بڑی تحقیق ہے۔انٹرنیشنل کنسورشیئم آف انویسٹیگیٹو جرنلسٹس (آئی سی آئی جے) کے بیان کے مطابق ’پینڈورا پیپرز‘ دنیا کے ہر حصے سے تعلق رکھنے والی ایک کروڑ 19 لاکھ سے زائد فائلز کے 'لیکڈ ڈیٹا بیس پر مشتمل ہیں۔

ادارے نے بتایا کہ دنیا کے 117 ممالک سے 150 میڈیا اداروں سے تعلق رکھنے والے 600 سے زائد رپورٹرز نے 2 سال تک جاری رہنے والی اس تحقیق میں حصہ لیا۔یاد رہے کہ اپریل 2016 میں آئی سی آئی جے کی تحقیق ’پنامہ پیپرز‘ کے نام سے سامنے آ?ئی تھی جس نے دنیا میں تہلکہ مچادیا تھا۔پنامہ پیپرز ایک کروڑ 15 لاکھ دستاویزات پر مشتمل تھے جس میں درجنوں سابق اور اس وقت کے سربراہان مملکت، کاروباری شخصیات، مجرموں، مشہور شخصیات اور کھلاڑیوں کی 'آف شور کمپنیوں کا ریکارڈ موجود تھا۔