’ایران پر شرائط مسلط نہیں کی جا سکتیں‘، محمد جواد ظریف کا امریکہ کو دو ٹوک پیغام

ایران اور امریکہ کے درمیان طویل مذاکرات کے باوجود کسی نتیجے پر نہ پہنچنے کے بعد ایرانی قیادت کی جانب سے سخت ردعمل سامنے آیا ہے۔ ایران کے سابق وزیر خارجہ محمد جواد ظریف نے واضح الفاظ میں کہا ہے کہ کسی بھی مذاکراتی عمل کو یکطرفہ شرائط کے تحت کامیاب نہیں بنایا جا سکتا اور امریکہ کو اس حقیقت کو سمجھنا ہوگا۔

محمد جواد ظریف نے اپنے بیان میں کہا کہ اگر کوئی یہ جاننا چاہتا ہے کہ مذاکرات کیوں ناکام ہوئے تو اس کا سادہ جواب یہ ہے کہ بات چیت کو ’ہماری یا تمہاری شرائط‘ کے دائرے میں محدود کر دیا گیا تھا۔ انہوں نے امریکی نائب صدر جے ڈی وینس کے اس بیان کا حوالہ دیا جس میں کہا گیا تھا کہ ایران نے امریکی شرائط کو ماننے سے انکار کیا۔ ظریف نے اس مؤقف کو مسترد کرتے ہوئے کہا کہ اس طرزِ فکر کے ساتھ کوئی بھی سفارتی کوشش کامیاب نہیں ہو سکتی۔

خیال رہے کہ ایران اور امریکہ کے درمیان حالیہ کشیدگی کے تناظر میں دونوں ممالک کے درمیان دو ہفتوں کے جنگ بندی معاہدے کے بعد پاکستان میں مذاکرات کا انعقاد ہوا تھا، تاہم یہ بات چیت کسی ٹھوس نتیجے تک نہ پہنچ سکی۔ اس پیش رفت کے بعد خطے میں سیاسی اور سفارتی سرگرمیاں مزید تیز ہو گئی ہیں۔

دوسری جانب ایرانی حکام نے ملک میں جاسوسی کے ایک بڑے نیٹ ورک کے خلاف کارروائی کرتے ہوئے کم از کم 50 افراد کو گرفتار کرنے کا دعویٰ کیا ہے۔ سرکاری خبر رساں ادارے کے مطابق ان افراد پر حساس تنصیبات، سروس سہولیات اور اہم انفراسٹرکچر سے متعلق معلومات امریکہ اور اسرائیل کو فراہم کرنے کا الزام ہے۔ حکام نے اس کارروائی کے دوران الیکٹرانک آلات، سیٹلائٹ ساز و سامان اور اسلحہ بھی ضبط کرنے کا دعویٰ کیا ہے۔

ایران میں حالیہ کشیدگی کے دوران جاسوسی کے الزامات میں گرفتاریاں کوئی نئی بات نہیں ہیں۔ گزشتہ برس بھی امریکہ اور اسرائیل کے ساتھ بارہ روزہ تنازع کے بعد متعدد افراد کو حراست میں لیا گیا تھا۔ اس کے علاوہ ایران میں حال ہی میں متعارف کرائے گئے سخت جاسوسی قوانین کے تحت ایسے جرائم میں ملوث افراد کو سزائے موت اور جائیداد کی ضبطی جیسی سخت سزاؤں کا سامنا کرنا پڑ سکتا ہے۔

ایرانی وزارت خارجہ کے ترجمان اسماعیل بقائی نے بھی اس موقع پر اہم بیان دیتے ہوئے کہا کہ سفارت کاری کبھی ختم نہیں ہوتی۔ انہوں نے کہا کہ سفارتی نظام کسی بھی ملک کے مفادات کے تحفظ اور دفاع کا ایک اہم ذریعہ ہے اور ایران اپنے ہمسایہ اور دوست ممالک کے ساتھ رابطے اور مذاکرات کا عمل جاری رکھے گا۔