ایران کے سابق کمانڈر مرحوم قاسم سلیمانی کی بھتیجی کو امریکہ چھوڑنے کا حکم

مغربی ایشیا میں ایران کے ساتھ جاری جنگ کے تناظر میں امریکی صدر ڈونالڈ ٹرمپ کی قیادت میں امریکی انتظامیہ نے 4 اپریل 2026 کو ایک اہم اور متنازع اقدام اٹھایا ہے۔ اس کارروائی کے تحت ایران کے سابق کمانڈرمرحوم قاسم سلیمانی کی بھتیجی حمیدہ سلیمانی افشار کا گرین کارڈ منسوخ کر دیا گیا ہے۔ یاد رہے کہ قاسم سلیمانی جنوری 2020 میں امریکہ کے ایک فضائی حملے میں ہلاک ہو گئے تھے، جس کے بعد دونوں ممالک کے تعلقات میں شدید کشیدگی پیدا ہو گئی تھی۔

امریکی وزیر خارجہ مارکو روبیو نے سوشل میڈیا پلیٹ فارم ایکس پر اس فیصلے کی تصدیق کرتے ہوئے کہا کہ دونوں ماں بیٹی امریکہ میں مستقل رہائش (گرین کارڈ) کے تحت مقیم تھیں، تاہم اب ان کی قانونی حیثیت ختم کر دی گئی ہے۔ مارکو روبیو نے اپنے بیان میں الزام عائد کیا کہ حمیدہ افشار ایران کے نظام کی سخت حامی رہی ہیں اور انہوں نے امریکی شہریوں پر ہونے والے حملوں کی حمایت اور جشن منایا، حتیٰ کہ امریکہ کو “گریٹ سیٹن” (بڑا شیطان) بھی قرار دیا۔ ان کے مطابق، اسی بنیاد پر ان کے خلاف کارروائی کی گئی۔

انہوں نے مزید کہا کہ اس ہفتے دونوں کی قانونی حیثیت ختم کرنے کے بعد انہیں امیگریشن اینڈ کسٹمز انفورسمنٹ (ICE) کی تحویل میں دے دیا گیا ہے اور اب انہیں امریکہ سے بے دخل کرنے کی کارروائی جاری ہے۔ ٹرمپ انتظامیہ کا مؤقف ہے کہ امریکہ کسی بھی ایسے غیر ملکی کو پناہ نہیں دے گا جو امریکہ مخالف یا دہشت گردی سے وابستہ نظریات کی حمایت کرتا ہو۔

امریکی محکمہ خارجہ کے مطابق حمیدہ افشار کے شوہر کے امریکہ میں داخلے پر بھی پابندی عائد کر دی گئی ہے۔ اس سے قبل بھی اسی ماہ مارکو روبیو نے ایران کی سپریم نیشنل سیکیورٹی کونسل کے سابق سیکریٹری علی لاریجانی کی بیٹی فاطمہ اردشیر لاریجانی اور ان کے شوہر سید کلانتر معتمدی کی قانونی حیثیت ختم کر دی تھی۔ علی لاریجانی حالیہ مشرق وسطیٰ کی جنگ کے دوران اسرائیلی حملوں میں ہلاک ہو گئے تھے۔یہ اقدامات ظاہر کرتے ہیں کہ امریکہ ایران سے جڑے افراد کے خلاف اپنی پالیسی کو مزید سخت بنا رہا ہے، جس کے اثرات مستقبل میں دونوں ممالک کے تعلقات پر مزید گہرے ہو سکتے ہیں۔