میکسیکو فوجی کارروائی میں ڈرگ مافیا ایل مینچو ہلاک، ملک بھر میں ہنگامہ آرائی

میکسیکو کی فوج نے اتوار کے روز ایک بڑے آپریشن کے دوران جالیسکو نیو جنریشن کارٹیل کے سربراہ نیمیسيو روبین اوسیگیرا سروینتیس المعروف ایل مینچو کو ہلاک کر دیا۔ حکام کے مطابق یہ کارروائی ریاست جالیسکو کے قصبے تاپالپا میں کی گئی، جو گوادالاخارا سے تقریباً دو گھنٹے کی مسافت پر جنوب مغرب میں واقع ہے۔ وزارت دفاع کے بیان میں کہا گیا کہ ملزم کو گرفتار کرنے کی کوشش کے دوران فائرنگ کا تبادلہ ہوا، جس میں وہ زخمی ہوا اور بعد ازاں میکسیکو سٹی منتقل کرتے وقت راستے میں دم توڑ گیا۔

ایل مینچو کو میکسیکو کے طاقتور ترین منشیات فروش گروہوں میں شمار ہونے والے جالیسکو نیو جنریشن کارٹیل کا بانی اور سربراہ سمجھا جاتا تھا۔ یہ گروہ امریکہ میں فینٹانائل اور دیگر منشیات کی اسمگلنگ کے لیے بدنام رہا ہے۔ سن 2009 میں قائم ہونے والا یہ کارٹیل تیزی سے پھیلتا گیا اور ملک کے مختلف حصوں میں اپنی جڑیں مضبوط کرتا رہا۔ امریکی حکام نے اس کی گرفتاری کی اطلاع دینے والے کے لیے پندرہ ملین ڈالر انعام کا اعلان کر رکھا تھا، جبکہ فروری میں اسے غیر ملکی دہشت گرد تنظیم قرار دیا گیا تھا۔

فوجی بیان کے مطابق آپریشن کے دوران مسلح افراد نے اہلکاروں پر شدید فائرنگ کی۔ جھڑپ میں چار افراد موقع پر ہلاک ہوئے جبکہ ایل مینچو سمیت تین دیگر زخمیوں کی بعد میں موت ہوگئی۔ دو مشتبہ افراد کو گرفتار کر لیا گیا ہے۔ سکیورٹی فورسز نے بکتر بند گاڑیاں، راکٹ لانچر اور بڑی مقدار میں اسلحہ بھی برآمد کیا۔ اس کارروائی میں مسلح افواج کے تین اہلکار زخمی ہوئے جن کا علاج جاری ہے۔

کارٹیل کے سربراہ کی ہلاکت کی خبر سامنے آتے ہی ملک کے مختلف علاقوں میں کشیدگی پھیل گئی۔ اطلاعات کے مطابق کارٹیل کے ارکان نے کئی گاڑیوں کو نذر آتش کیا اور کم از کم ایک درجن ریاستوں میں شاہراہوں کو بند کر دیا۔ جالیسکو کا دارالحکومت گوادالاخارا اتوار کی رات سنسان دکھائی دیا، جہاں شہری خوف کے باعث گھروں تک محدود رہے۔ متعدد ریاستوں میں پیر کے روز تعلیمی ادارے بند رکھے گئے اور عوامی نقل و حمل معطل کر دی گئی۔

امریکی محکمہ خارجہ نے جالیسکو، تاماؤلیپاس، میچواکان، گوریرو اور نووو لیون میں موجود اپنے شہریوں کو محفوظ مقامات پر رہنے کی ہدایت جاری کی ہے۔ میکسیکو میں کینیڈا کے سفارت خانے نے بھی اپنے شہریوں کو پویئرتو وییارٹا اور جالیسکو کے دیگر علاقوں میں غیر ضروری نقل و حرکت سے گریز کرنے کا مشورہ دیا ہے۔ جالیسکو کے گورنر پابلو لیمس نے رہائشیوں کو گھروں میں رہنے کی اپیل کی اور سکیورٹی اقدامات مزید سخت کر دیے گئے ہیں۔

حکام کا کہنا ہے کہ اگرچہ اس کارروائی کو منشیات کے خلاف جنگ میں بڑی کامیابی سمجھا جا رہا ہے، تاہم اس کے بعد پیدا ہونے والی صورتحال نے ایک بار پھر میکسیکو میں جرائم پیشہ گروہوں کی طاقت اور ریاست کو درپیش چیلنجز کو نمایاں کر دیا ہے۔