عراق مظاہرے: تازہ ہلاکتوں کے بعد حالات تشویش ناک، انٹرنیٹ خدمات پر پابندی

بغداد: عراق کے دارالحکومت بغداد میں جاری احتجاجی مظاہرے کے دوران حالات انتہائی دھماکہ خیز ہو چکے ہیں۔ دریں اثنا 4 افراد کی موت ہونے اور 150 سے زائد افراد کے زخمی ہونے کی اطلاع موصول ہوئی ہے۔ احتجاجی مظاہروں پر قابو پانےکے لیے بغداد اور متعدد دیگر شہروں میں انٹرنیٹ سروس معطل کردی گئی ہے۔ دوسری جانب سیکورٹی فورسز نے بغداد میں عراقی ٹیلی ویژن کی عمارت کے قریب احتجاج کرنے والے مظاہرین کو منتشر کر دیا ہے۔

غیر ملکی میڈیا کے مطابق سیکورٹی فورسز نے بغداد کے الشہدا پل پر مظاہرین کو منتشر کرنے کے لئے فائرنگ کردی جس کے نتیجے میں متعدد مظاہرین زخمی ہو گئے۔ قبل ازیں مظاہرین نے کربلا میں ایرانی قونصل خانے کی عمارت میں گھس کر وہاں پر عراقی پرچم لہرا دیا۔

ایک تازہ پیش رفت کے مطابق مظاہرین نے وسطی بغداد میں وزارت انصاف کی طرف بڑھنے کی کوشش کی جس پر سیکورٹی حکام نے جوابی کارروائی کی ہے۔ وزارت انصاف کی عمارت کے قریب بڑے پیمانے پر آتش زدگی دیکھی گئی۔ سیکورٹی فورسز نے ہجوم پر آنسو گیس شیل فائر کیے۔ عراقی فوج کے ترجمان نے وزارت انصاف کے صدر دفتر کے سامنے مظاہرین کو منتشر کرنے کا اعلان کیا۔

پیر کے روز وزیراعظم عادل عبدالمہدی کی اپیل کے باوجود ہزاروں مظاہرین نے احتجاج کیا۔ وزیراعظم نے مظاہرین سے کہا تھا کہ وہ احتجاج ختم کردیں کیونکہ احتجاج کی وجہ سےعراقی معیشت کو اربوں ڈالر کا نقصان ہو رہا ہے اور ملک میں نظام زندگی درہم برہم ہو رہی ہے۔

واضح ر ہے کہ اکتوبر کے اوائل سے بے روزگاری، سرکاری بدعنوانی اور بنیادی سہولیات کی عدم دستیابی کے معاملے میں عراق کے دارالحکومت بغداد اور کئی صوبوں سمیت پورے ملک میں لوگوں کا احتجاج جاری ہے اور مظاہروں کے دوران بغداد میں پولس کے ساتھ تصادم اور تشدد کے واقعات بھی سامنے آ رہے ہیں۔ پرتشدد مظاہروں میں اب تک سینکڑوں لوگوں کی جان جا چکی ہے۔

وزیر اعظم عادل عبد المہدی نے اس سے قبل مظاہرین سے امن و امان برقرار رکھنے کی اپیل کرتے ہوئے کہا تھا کہ اصلاحات کے لئے مظاہرین کا مطالبہ اور بدعنوانی کے خلاف جنگ حکومت تک پہنچ چکی ہے۔ حکومت ہر جائزمطالبات کو پورا کرے گی۔ انہوں نے یہ بھی کہا تھا کہ ان کی حکومت جھوٹے وعدے نہیں کرے گی۔