اگر امریکہ نے بحری ناکہ بندی جاری رکھی تو ایران آبنائے ہرمز کو بند کر دے گا: باقر قالیباف

 ایران اور امریکہ کے درمیان ایک طرف مذاکرات کی کوششیں جاری ہیں، وہیں دوسری طرف سخت بیان بازی بھی رُکنے کا نام نہیں لے رہی ہے۔ ایرانی پارلیمنٹ کے اسپیکرمحمد باقر قالیباف نے امریکی صدر ڈونالڈ ٹرمپ کو خبردار کیا ہے کہ اگر امریکہ نے بحری ناکہ بندی جاری رکھی تو ایران آبنائے ہرمز کو بند کر دے گا۔ قالیباف کی جانب سے یہ انتباہ امریکی صدر کے ذریعہ ناکہ بندی کو ’پوری طرح سے نافذ‘ رکھنے کے اعلان کے فوراً بعد آیا ہے۔ اس کے ساتھ ہی انہوں نے ٹرمپ پر ایک گھنٹے میں 7 جھوٹے دعوے کرنے کا بھی الزام لگایا۔

سوشل میڈیا پلیٹ فارم ’ ایکس‘ پر ایک پوسٹ میں قالیباف نے کہا کہ آبنائے ہرمز سے گزرنے کے لیے مقررہ راستے کا تعین صرف ایرانی حکام کی اجازت سے کیا جائے گا۔ انہوں نے واضح طور پر کہا کہ اگر ناکہ بندی جاری رہی تو آبنائے ہرمز کھلا نہیں رہے گا۔

یہ بیان ایران کی جانب سے جنگ بندی کے باقی ماندہ تمام تجارتی جہازوں کے لیے آبنائے ہرمز کو مکمل طور پر کھولنے کے اعلان کے چند گھنٹے بعد آیا ہے۔ ایرانی وزیر خارجہ عباس عراقچی نے کہا تھا کہ لبنان میں ہوئی جنگ بندی کے مطابق آبنائے ہرمز سے تمام تجارتی جہازوں کے گزرنے کو جنگ بندی کی باقی میعاد کے لیے مکمل طور پر کھلا قرار دیا گیا ہے۔ یہ ایران کی بندرگاہوں اور میری ٹائم آرگنائزیشن کی جانب سے پہلے سے اعلان کردہ مربوط راستے پر ہی نافذ ہوگا۔

اس پر اپنے ردعمل کا اظہار کرتے ہوئے صدر ٹرمپ نے صاف کیا کہ ایران کے ساتھ معاہدہ مکمل ہونے تک آبنائے ہرمز کی بحری ناکہ بندی برقرار رہے گی۔ حالانکہ انہوں نے دعویٰ کیا کہ یہ عمل بہت جلد مکمل ہو جائے گا کیونکہ رکاوٹوں پر پہلے ہی بات ہو چکی ہے۔ ٹرمپ نے یہ بھی خبردار کیا کہ اگر معاہدہ نہ ہوا تو امریکہ ’دوبارہ بمباری شروع کر سکتا ہے‘۔ انہوں نے کہا کہ ہوسکتا ہے کہ میں اس میں توسیع نہ کروں لیکن ناکہ بندی (ایرانی بندرگاہوں پر) جاری رہے گی۔ اس لیے ناکہ بندی ہے اور بدقسمتی سے ہمیں دوبارہ بمباری شروع کرنا پڑے گی۔

ٹرمپ کے بیان پر قالیباف نے جواب دیا کہ آبنائے ہرمز کھلا رہے گا یا بند اور اس پر کنٹرول کرنے والے قوانین زمینی سطح پر طے کئے جائیں گے سوشل میڈیا پر نہیں۔ اس کے ساتھ ہی انہوں نے الزام لگایا کہ ٹرمپ نے ’ایک گھنٹے میں 7 دعوے‘ کیے ہیں جن میں سبھی ’جھوٹے‘ تھے۔ تاہم انہوں نے یہ نہیں بتایا کہ وہ دعوے کیا تھے۔

واضح رہے کہ آبنائے ہرمز ایک اہم آبی گزرگاہ ہے، جس سے دنیا کے تقریباً پانچویں حصے کی تیل سپلائی ہوتی ہے۔ ایران جنگ کے دوران تقریباً دو ماہ تک اس کی بندش نے کئی ممالک میں خام تیل کی قیمتوں اور سپلائی کو متاثر کیا ہے۔ اب جب کہ ایران نے اسے مکمل طور پر دوبارہ کھول دیا ہے، یہ واضح نہیں ہے کہ تجارتی بحری جہاز آپریشن دوبارہ شروع کرنے کے لیے کتنے پُراعتماد ہوں گے۔ وال اسٹریٹ جرنل کی ایک رپورٹ میں دعویٰ کیا گیا ہے کہ یہ جہاز واضح حفاظتی ضمانتوں کا انتظار کررہے ہیں۔