آبنائے ہرمز کا بحران: یورپ اور جاپان کا جہازوں کے تحفظ کے لیے مشترکہ اقدام کا اشارہ

آبنائے ہرمز میں بڑھتی ہوئی کشیدگی اور تجارتی جہازوں پر مسلسل حملوں کے پس منظر میں یورپ اور جاپان سمیت چھ اہم ممالک نے اس اہم سمندری راستے کی حفاظت کے لیے مشترکہ حکمت عملی اپنانے کا اشارہ دیا ہے۔ برطانیہ، فرانس، جرمنی، اٹلی، نیدرلینڈ اور جاپان کی جانب سے جاری مشترکہ بیان میں واضح کیا گیا ہے کہ یہ ممالک مل کر ایسے اقدامات کریں گے جن سے اس حساس گزرگاہ میں جہازوں کی آمد و رفت کو محفوظ اور معمول کے مطابق رکھا جا سکے۔

مشترکہ بیان میں اس بات پر زور دیا گیا کہ آبنائے ہرمز عالمی توانائی سپلائی کے لیے انتہائی اہم حیثیت رکھتی ہے، جہاں سے بڑی مقدار میں خام تیل اور مائع گیس دنیا کے مختلف خطوں تک پہنچتی ہے۔ اسی لیے اس راستے کی سلامتی کو یقینی بنانا نہ صرف علاقائی بلکہ عالمی ترجیح ہے۔ بیان میں یہ بھی عندیہ دیا گیا کہ اگر ضرورت پڑی تو اضافی حفاظتی اقدامات بھی کیے جائیں گے۔

دوسری جانب ایران کی جانب سے حالیہ حملوں پر ان ممالک نے سخت ردعمل ظاہر کیا ہے۔ خاص طور پر قطر اور سعودی عرب کے تیل و گیس کے تنصیبات کو نشانہ بنانے کے واقعات کو تشویش ناک قرار دیا گیا ہے۔ قطر کی توانائی کمپنی کے مطابق ان حملوں کے نتیجے میں اس کی ایل این جی برآمدات کی صلاحیت میں تقریباً 17 فیصد کمی آئی ہے، جس سے بھاری مالی نقصان کا اندیشہ ہے۔

آبنائے ہرمز میں موجودہ صورتحال نے عالمی سطح پر توانائی کی سپلائی چین کو متاثر کیا ہے۔ اطلاعات کے مطابق ڈرون اور دھماکہ خیز کشتیوں کے ذریعے ہونے والے حملوں کے بعد متعدد تجارتی جہاز اس راستے سے گزرنے سے گریز کر رہے ہیں، جبکہ کئی جہاز سمندری حدود کے باہر رکے ہوئے ہیں۔ اس صورتحال کا اثر ہندوستان سمیت کئی ممالک کی معیشت پر بھی پڑ رہا ہے، جہاں توانائی کی دستیابی اور قیمتوں میں اتار چڑھاؤ دیکھا جا رہا ہے۔

اس کشیدہ ماحول کے پیش نظر ان ممالک نے توانائی پیدا کرنے والے دیگر ملکوں کے ساتھ رابطے بڑھانے اور پیداوار میں اضافہ کرنے کی ضرورت پر بھی زور دیا ہے تاکہ عالمی منڈی کو مستحکم رکھا جا سکے۔ ساتھ ہی ایران سے مطالبہ کیا گیا ہے کہ وہ فوری طور پر حملے بند کرے اور خطے میں استحکام کو یقینی بنانے میں تعاون کرے، کیونکہ موجودہ حالات بین الاقوامی امن اور سلامتی کے لیے ایک سنجیدہ چیلنج بن چکے ہیں۔