شمالی جاپان کے بعد اب چین میں آیا زلزلہ، ریکٹر اسکیل پر شدت 5.5 درج

ہفتہ کے روز چین میں زلزلہ کے جھٹکا نے لوگوں کو خوف و ہراس میں مبتلا کر دیا۔ ریکٹر اسکیل پر اس زلزلہ کی شدت 5.5 بتائی جا رہی ہے، جس کو مقامی لوگوں نے واضح طور پر محسوس کیا۔ جنوبی کوریا سے ملحق چین کے جلین علاقہ میں اس زلزلہ کی شدت سب سے زیادہ محسوس کی گئی۔

خبر رساں ایجنسی شنہوا کے مطابق زلزلہ چین کے شہر ہُنچن میں مقامی وقت کے مطابق شام 7.45 بجے آیا۔ اس کا مرکز 560 کلومیٹر، یعنی تقریباً 348 میل کی گہرائی میں تھا۔ اس زلزلہ سے کسی جانی و مالی نقصان کی خبر نہیں ہے، لیکن شمالی جاپان میں گزشتہ روز آئے زلزلہ کے بعد چین میں آیا زلزلہ تشویش پیدا کرنے والا ہے۔

قابل ذکر ہے کہ جمعہ کے روز شمالی جاپان کے مشرقی ہوکائیڈو میں 5.9 شدت کا زلزلہ آیا تھا۔ جاپانی موسمیاتی ایجنسی کے مطابق زلزلہ نیمورو پیننسولا کے جنوب مشرق میں تقریباً 40 کلومیٹر کی گہرائی میں آیا۔ اس زلزلہ میں کسی کے ہلاک یا زخمی ہونے کی جانکاری سامنے نہیں آئی ہے۔ افسران نے اس زلزلہ کے بعد ایک بیان جاری کر لوگوں سے پریشان نہ ہونے کی اپیل کی، اور کہا کہ سنامی کا فی الحال کوئی خطرہ نہیں ہے۔

جاپان کی خبر رساں ایجنسی کیوڈو نے اس زلزلہ سے متعلق بتایا کہ دوپہر تقریباً 1.40 بجے آیا تھا۔ اس زلزلہ کی شدت شمالی جزیرہ کے کچھ حصوں میں جاپان کے 7 سطح والے زلزلہ سے متعلق پیمانہ پر 5 سے کچھ کم تھی۔ زلزلہ کے بعد فائر اینڈ ڈیزاسٹر مینجمنٹ ایجنسی نے ایمرجنسی کا الرٹ جاری کیا، جس میں جاپانی پیمانے پر 5 تک کی شدت کا اندازہ لگایا گیا۔