عراق میں کووڈ اسپتال میں آتشزدگی سے 28 مریضوں کی موت، 50 زخمی، اسپتال کا سربراہ زیر حراست

بغداد: عراق کی راجدھانی بغداد میں کووڈ اسپتال میں سنیچر کی رات آگ لگ جانے سے کم از کم 20 سے زیادہ مریضوں کی موت ہوگئی اور بڑی تعداد میں لوگ زخمی ہو گئے۔ مقامی میڈیا کی تازہ رپورٹوں کے مطابق واقعہ میں مرنے والوں کی تعداد 28 ہو گئی ہے جبکہ 50 سے زیادہ لوگ زخمی ہوئے ہیں۔ وزیر اعظم مصطفیٰ الکاظمی نے اس واقعہ کی جانچ کے احکامات جاری کر دئے ہیں۔

عراق کے وزیراعظم مصطفى الكاظمی نے راجدھانی بغداد میں کووڈ اسپتال میں آگ لگنے کے واقعہ کی جانچ ہونے تک اسپتال کے سربراہ کو حراست میں رکھے جانے کے احکام جاری کئے۔ وزیراعظم کے دفتر نے اتوار کو یہ اطلاع دی۔

نیوز پورٹل بغداد الیوم نے ذرائع کے حوالے سے اپنی رپورٹ میں بتایا کہ آکسیجن سلینڈر میں دھماکہ ہونے سے آگ لگ گئی۔ رپورٹ کے مطابق مرنے والوں کی تعداد میں اضافہ ہوسکتا ہے۔

وزیراعظم کے دفتر کی جانب سے جاری بیان کے مطابق الکاظمی نے فوری طور پر حادثے کے اسباب کی جانچ کئے جانے کے احکام جاری کئے ہیں۔ بیان میں کہا گیا ہے کہ جانچ مکمل ہونے تک اسپتال کے سربراہ ، سیکیورٹی سروسز کے ڈائریکٹر اور آلات کی دیکھ ریکھ کے ذمہ دار افراد زیر حراست رہیں گے۔