طبی یونانی کے فروغ میں حکیم اجمل خان اور حکیم عبد الحمیدکا نمایاں کردار۔ پروفیسر افشار عالم

طبی یونانی کے فروغ اور بقاء میں حکیم اجمل خان اور حکیم عبد الحمید کی خدمات پر روشنی ڈالتے ہوئے جامعہ ہمدرد کے وائس چانسلر پروفیسر افشار عالم نے کہا کہ طب یونانی کے فروغ اور اسے مقبول بنانے میں انہوں نے نمایاں کردار ادا کیا ہے۔ یہ بات انہوں نے جامعہ ہمدردمیں یونانی ڈے کے موقع پر منعقدہ پروگرام سے خطاب کرتے ہوئے کہی۔

انہوں نے کہاکہ خصوصی طور پر حکیم عبد الحمید کی تعلیمی بیداری اور عوام کی صحت کے لئے نمایاں کام کیا ہے اور جامعہ ہمدرد اور ہمدرد اسکول کی اس کی جیتی جگتی مثال ہے۔ انہوں نے یقین دہانی کرائی کہ وہ اسکول آف یونانی میڈیکل ایجوکیشن اینڈ ریسرچ کی ترقی میں درپیش تمام تر مسائل کو کرنے میں بھر پور تعاون کرینگے۔انہوں نے پروگرام کی آرگنائزنگ ٹیم کوخصوصی مبارکباد دی۔

نیشنل کمیشن برائے انڈین سسٹم آف میڈیسن کے صدر، وید جینت دیو پجاری جی نے طلبا کو یونانی پیتھی کے عمیق مطالعہ کی طرف راغب کیا اور ساتھ ہی سائنسی تحقیقات کو عام فہم زبان میں بیان کرنے کی اہمیت پر روشنی ڈالی۔ انہوں نے اساتذہ کو طلباء کے مستقبل کے لئے معاون ہونے پر زور دیا ساتھ ہی گورنمنٹ کی طرف سے ہر ممکن مدد کا بھروسہ بھی دلایا۔

پروگرام کے مہمان خصوصی عاصم علی خان، ڈائریکٹر جنرل، سینٹرل کاؤنسل فار ریسرچ ان یونانی میڈیسن، سی سی آر یو ایم، وزارت آیوش، گورنمنٹ آف انڈیا نے اپنے خطاب میں کاؤنسل کی نمایاں کارکردگیوں کو بیان کیا ساتھ ہی اس کے ذریعہ کی جانے والی ریسرچ سے عوام کو روشناس کرایا خصوصی طور پر چنّئی، حیدرآباد، سری نگر اور لکھنؤ کے سینٹر پر موجود ریسرچ سہولیات پر بات کی۔ انہوں نے مشترکہ ریسرچ پروجیکٹس پر جامعہ ہمدرد کے ساتھ تعاون کا بھی یقین دلایا۔

طب یونانی کی موجودہ دور میں افادیت اور معنویت کے موضوع پر کلیدی خطبہ اے اینڈ یو طبیہ کالج قرول باغ کے سابق پرنسپل اور صدر شعبہ علم الادویہ و صیدلہ جناب پروفیسر محمد ادریس صاحب نے پیش کیا۔ انہوں نے اپنے خطاب میں علاج معالجہ میں اخلاقیات اور انسانی حقوق کی پابندی پر زور دیا۔

پروگرام کی شروعات، فیکلٹی کے ڈین سید محمد عارف زیدی نے مہمانان کا خیر مقدم سے ہوئی اوراسکول آف یونانی میڈیکل ایجوکیشن اینڈ ریسرچ کی نمایاں کارکردگیوں سے روشناس کرایا گیا۔ پروگرام کی صدارت جامعہ ہمدرد کے چانسلر اور ہمدرد نیشنل فاؤنڈیشن کے چیف متولی حمّاد احمدنے کی۔

پروگرام کے آخر میں سید سعود د اختر، رجسٹرار جامعہ ہمدرد نے تمام مہمانوں، اراکین میڈیا اور انتظامیہ کا شکریہ ادا کیا۔ خصوصی طور پر پروگرام کی آرگنائزنگ ٹیم ممبران ڈاکٹر خورشید احمد، پروفیسر محمد اکرم، ڈاکٹر عظمہ بانو اورڈاکٹر سیما رانی کو پروگرام کی کامیابی پر مبارکباد دی۔

واضح رہے کہ یہ پروگرام طب یونانی کے فروغ وہندوستان میں اسکی ترویج کو یادگار بنانے کے لئے منعقد کیا جاتا ہے ہر سال یہ پروگرام طب یونانی کے مشہور و معروف حاذق طبیب، مسیح الملک حکیم اجمل خان کے یوم پیدائش کے موقع پر منایا جاتا ہے۔