اس سال نوبل ادب انعام نہیں دیا جائے گا

ڈنمارک کے دارالحکومت کوپن ہیگن سے اتوار 30 ستمبر کو موصولہ نیوز ایجنسی ایسوسی ایٹڈ پریس کی رپورٹوں کے مطابق ہر سال ادب کے نوبل انعام کی حقدار ادبی شخصیت کا انتخاب کرنے والی سویڈش اکیڈمی کو ابھی تک ایک ایسے بڑے اسکینڈل کا سامنا ہے، جو اس کی ساکھ کے لیے بڑا خطرہ بنا ہوا ہے۔

اس جنسی اسکینڈل کا مرکزی کردار ژاں کلود آرنو نامی ایک ایسے فرانسیسی شہری ہیں، جو سویڈن میں ایک انتہائی اہم ثقافتی شخصیت تصور کیے جاتے ہیں۔ آرنو ہی کی وجہ سے اس اکیڈمی کی ساکھ نہ صرف بری طرح متاثر ہوئی بلکہ وہ اپنی معمول کی کارکردگی میں ایک سال کے وقفے کا اعلان کرنے پر بھی مجبور ہو گئی تھی۔

اس وقت 72 سالہ ژاں کلود آرنو کے خلاف سویڈن کے دارالحکومت سٹاک ہولم کی ایک عدالت میں مقدمے کی سماعت ابھی جاری ہے۔ ان پر الزام ہے کہ وہ متعدد مالیاتی بے قاعدگیوں کے علاوہ سات برس قبل ایک خاتون کی دو مرتبہ مبینہ ریپ کے مرتکب بھی ہوئے تھے۔ آرنو اپنے خلاف ان الزامات کی تردید کرتے ہیں۔

ژاں کلود آرنو کے خلاف مقدمے کا فیصلہ کل پیر یعنی آج متوقع ہے اور یہ وہی دن ہے جب کارولِنسکا انسٹیٹیوٹ کی طرف سے اس سال کے لیے نوبل انعامات کی حقدار شخصیات کے ناموں کے اعلان کا سلسلہ شروع ہو جائے گا۔ آج کو کیا جانے والا پہلا اعلان طب کے امسالہ نوبل انعام کی حقدار شخصیت یا شخصیات سے متعلق ہو گا۔

دوسری طرف سویڈش دفتر استغاثہ نے آرنو کے خلاف عائد کردہ الزامات کے باعث ان کے لیے تین سال کی سزائے قید کا مطالبہ کیا ہے۔ یہ بات بھی اہم ہے کہ ژاں کلود آرنو کے خلاف مقدمے میں عدالت جو بھی فیصلہ سنائے، سویڈش اکیڈمی کے لیے اس امر کی کوئی ضمانت نہیں کہ اسے مستقبل میں بھی ہر سال ادب کے نوبل انعام کے حقداروں کا انتخاب کرنے کی اجازت دے دی جائے گی۔

اس سلسلے میں نوبل فاؤنڈیشن کے سربراہ لارس ہائکَینسٹن نے جمعہ 28 ستمبر کو ہی کہہ دیا تھا کہ اگر سویڈش اکیڈمی اپنی ساکھ کے بحران سے باہر نکلتے ہوئے اس مسئلے کا کوئی حل نہیں نکالتی، تو بہتر ہو گا کہ ادب کے نوبل انعام کے حقدار کے انتخاب کی ذمے داری کسی دوسرے ادارے کے سپرد کر دی جائے۔

نوبل فاؤنڈیشن کے سربراہ نے تو یہ بھی کہہ دیا تھا کہ ممکن ہے کہ اگلے برس یعنی 2019ء میں بھی ادب کے نوبل انعام کا کوئی اعلان نہ کیا جائے۔

یہ امکان سویڈش اکیڈمی کے اب تک کے ان ارادوں کے بالکل برعکس ہے، جن کے مطابق اکیڈمی کا منصوبہ تھا کہ وہ اگلے برس بیک وقت ادب کے دو نوبل انعامات کا اعلان کر دے گی۔ ایک 2018ء کے لیے اور دوسرا 2019ء کے لیے۔

ژاں کلود آرنو سویڈن میں ایک ایسے بڑے ثقافتی گروپ کے سربراہ ہیں، جس کے سویڈش اکیڈمی کے ساتھ قریبی روابط ہیں۔ ان کے خلاف چھان بین اور سویڈش اکیڈمی کو درپیش بہت بڑے اسکینڈل کا آغاز اس وقت ہوا تھا، جب گزشتہ برس نومبر میں بیک وقت 18 خواتین نے ایک سویڈش اخبار میں آرنو پر یہ الزامات عائد کیے تھے کہ یہ فرانسیسی شہری ان خواتین کے جنسی استحصال کے مرتکب ہوئے تھے۔

ژاں کلود آرنو سویڈش اکیڈمی کی ایک (اب سابقہ) خاتون رکن اور شاعرہ کاتارینا فروسٹَینسن کے شوہر بھی ہیں۔ کاتارینا فروسٹَینسن نے اسی سال اپنے شوہر کی ذات سے متعلق اسکینڈل کے بہت شدت اختیار کر جانے کے بعد اپریل میں سویڈش اکیڈمی کی رکنیت سے استعفیٰ دے دیا تھا۔

فروسٹَینسن کے استعفے سے قبل اپریل ہی میں اکیڈمی نے اپنی صفوں میں ’غلط جنسی رویوں‘ کے الزامات کی داخلی چھان بین کے بعد یہ اعتراف بھی کر لیا تھا کہ اس باوقار ادارے میں ’ناپسندیدہ جسمانی قربت کی شکل میں ناقابل قبول رویہ‘ دیکھنے میں آیا تھا۔