خواتین ایشیا کپ: ہندوستان نے تھائی لینڈ کو 74 رن سے شکست دے کر فائنل میں جگہ بنائی

سلہٹ: شفالی ورما (42) کی دھماکہ خیز اننگز اور دیپتی شرما (7/3) کی شاندار گیند بازی کی بدولت ہندوستان نے جمعرات کو سیمی فائنل میں تھائی لینڈ کو 74 رن سے شکست دے کر خواتین ایشیا کپ 2022 کے فائنل میں جگہ بنا لی۔ ہندوستان نے تھائی لینڈ کو 20 اووروں میں 149 رن کا ہدف دیا جس کے جواب میں تھائی لینڈ کی ٹیم نو وکٹوں کے نقصان پر صرف 74 رن ہی بنا سکی۔

اوپنر شیفالی نے 28 گیندوں پر پانچ چوکوں اور ایک چھکے کی مدد سے 42 رن بنائے۔ ان کی اننگز کی بدولت ہندوستان آخری اووروں میں رن ریٹ رک جانے کے باوجود تھائی لینڈ کو 148 رن کا ہدف دے سکا۔ فائنل میں ہندوستان کا مقابلہ سری لنکا اور پاکستان کے درمیان ہونے والے سیمی فائنل کے فاتح سے ہوگا۔ تھائی لینڈ نے ٹاس جیت کر ہندوستان کو بلے بازی کے لیے بلایا اور پہلی وکٹ کے لیے 38 رن کی شراکت کے بعد اسمرتی مندھانا (13) کی وکٹ بھی حاصل کی۔

دوسرے سرے سے تاہم شیفالی نے رن بنانے کا سلسلہ جاری رکھا اور پاور پلے میں ہندوستان نے 47 رن جوڑے۔ شیفالی کی وکٹ کے بعد کریز پر آنے والی کپتان ہرمن پریت کور نے جمائمہ روڈریگز کے ساتھ تیسری وکٹ کے لیے 28 گیندوں پر 42 رن جوڑے۔ ہرمن پریت نے 30 گیندوں پر چار چوکوں کی مدد سے 36 رن جبکہ جمائمہ نے 26 گیندوں پر تین چوکوں کی مدد سے 27 رن بنائے۔ تاہم اس شراکت داری کے ٹوٹنے کے بعد ہندوستانی اننگز کی رفتار کم ہوگئی۔

پوجا وستراکر کے 13 گیندوں پر 17 رن کی مدد سے ہندوستان نے آخری پانچ اووروں میں 31 رن جوڑ کر 20 اووروں میں 6 وکٹ پر 148 رن بنائے۔ ہندوستانی گیند بازوں نے 148 رن کا دفاع کرتے ہوئے تھائی لینڈ کو کبھی تیز رن بنانے کی اجازت نہیں دی اور وقفے وقفے سے وکٹیں بھی حاصل کیں۔ دیپتی شرما نے ناناپٹ کونچاروینکائی (05)، نتھاکن چنتھم (04) اور سورنارین ٹیپوچ (05) کو آوٹ کیا جبکہ رینوکا سنگھ نے چنیڈا ستھیروانگ کو ایک رن پر آؤٹ کیا۔

21 رن پر تھائی لینڈ کی چار وکٹیں گرنے کے بعد کپتان نیومول چائی وائی اور نتایا بوچتھم نے 42 رن کی شراکت قائم کر کے ٹیم کو 63 رن تک پہنچایا حالانکہ اس وقت تک 17 اوور گزر چکے تھے۔ تھائی لینڈ کی ٹیم آخری تین اووروں میں صرف 11 رنوں پر تین وکٹیں گنوائیں اور 20 اووروں میں اسکور 74/9 تک پہنچا سکی۔ ہندوستان کی جانب سے شیفالی ورما اور اسنیہ رانا نے بھی ایک ایک وکٹ حاصل کیا جبکہ راجیشوری گائیکواڈ نے دو وکٹیں حاصل کیں۔