ویبھو سوریہ ونشی کو آئرلینڈ کے خلاف میچ میں نہیں ملا موقع، کپتان شریئس ایر نے کہا ’انھیں انتظار کرنا ہوگا‘

کروڑوں ہندوستانی کرکٹ شائقین کو امید تھی کہ 15 سالہ نوجوان سنسنی ویبھو سوریہ ونشی جمعہ (26 جون) کو آئرلینڈ کے خلاف ٹی-20 بین الاقوامی میچ کے ذریعہ اپنا بین الاقوامی ڈیبیو کریں گے، لیکن پلیئنگ الیون میں ان کا نام شامل نہیں تھا۔ یعنی ویبھو کے ڈیبیو کا انتظار ابھی کچھ اور طویل ہو گیا ہے۔ ٹاس کے دوران کپتان شریئس ایئر نے اس فیصلہ کی وجہ بھی واضح کر دی۔

بیلفاسٹ میں ٹاس جیتنے کے بعد شریئس ایئر نے پہلے گیندبازی کا فیصلہ کیا۔ انہوں نے کہا کہ ٹیم کے بیشتر کھلاڑی پہلی بار اس میدان اور ان حالات میں کھیل رہے ہیں، اس لیے پہلے گیندبازی کرنا بہتر انتخاب محسوس ہوا۔ جب ان سے ویبھو سوریہ ونشی کے ڈیبیو کے بارے میں سوال کیا گیا تو شریئس نے نوجوان بلے باز کی بھرپور تعریف کی، تاہم یہ بھی واضح کر دیا کہ ’فی الحال انہیں انتظار کرنا ہوگا۔‘

شریئس ایئر نے کہا کہ ’’بدقسمتی سے ویبھو اس میچ میں نہیں کھیل رہے ہیں۔ وہ ایک غیر معمولی صلاحیتوں کے حامل کھلاڑی ہیں، لیکن ہماری ٹیم میں کئی تجربہ کار کھلاڑی موجود ہیں جنہوں نے گزشتہ کچھ عرصے میں ہندوستان کے لیے شاندار کارکردگی کا مظاہرہ کیا ہے۔ ہم انہی کھلاڑیوں پر اعتماد ظاہر کر رہے ہیں جنہوں نے پورے سیزن میں عمدہ کرکٹ کا مظاہرہ کیا ہے۔ ویبھو کو مناسب وقت آنے پر ضرور موقع دیا جائے گا۔‘‘ کپتان شریئس ایئر کے اس بیان سے واضح ہو گیا کہ ٹیم انتظامیہ فی الحال تجربے کو ترجیح دے رہی ہے، یعنی ویبھو سوریہ ونشی کو مستقبل کے لیے تیار کیا جا رہا ہے۔

شریئس نے یہ بھی بتایا کہ ہیڈ کوچ گوتم گمبھیر نے کھلاڑیوں کو اپنے کھیل پر بھروسا رکھنے اور بے خوف انداز میں کھیلنے کی ہدایت دی ہے۔ انھوں نے کہا کہ ’’گوتم گمبھیر نے کھلاڑیوں سے کہا ہے کہ وہ خود پر اعتماد رکھیں، اپنے کھیل کا کھل کر اظہار کریں اور میدان میں مکمل طور پر بے خوف رہیں۔ ہمیں حالات کے مطابق جلد خود کو ڈھالنا ہوگا اور اس کے لیے ہم نے اچھی مشق بھی کی ہے۔‘‘

واضح رہے کہ ٹی-20 عالمی کپ چمپئن ہندوستان اس سیریز کے ساتھ اپنے نئے مشن کا آغاز کر رہا ہے۔ تاہم شریئس ایئر نے کہا کہ ٹیم فی الحال مستقبل کے بارے میں نہیں سوچ رہی۔ انھوں نے کہا کہ ’’ہم ایک وقت میں ایک میچ پر توجہ مرکوز کر رہے ہیں۔ آخری ہدف یقیناً بڑا ہے، لیکن اس وقت ہماری پوری توجہ آئرلینڈ کے خلاف اس سیریز میں بہترین کارکردگی دکھانے پر ہے۔‘‘ اپنے طرز قیادت پر بات کرتے ہوئے ہندوستانی کپتان نے کہا کہ وہ کھلاڑیوں کو چیزوں کو سادہ رکھنے کا مشورہ دیتے ہیں۔ انھوں نے کہا کہ ’’میں ہمیشہ کہتا ہوں کہ کرکٹ کو غیر ضروری طور پر پیچیدہ بنانے کی ضرورت نہیں ہے۔ حال میں رہیں، کھیل سے لطف اٹھائیں اور اپنی بہترین کارکردگی پیش کریں۔ یہی سب سے اہم بات ہے۔‘‘

ویبھو سوریہ ونشی کو پہلے میچ میں موقع نہیں ملا، لیکن کپتان کے بیان سے یہ اشارہ ضرور ملا ہے کہ ٹیم انتظامیہ انہیں مستقبل کا ایک بڑا کھلاڑی سمجھتی ہے۔ ایسے میں اب شائقین کی نظریں سیریز کے اگلے مقابلے پر مرکوز ہیں، جہاں 15 سالہ یہ نوجوان بلے باز ممکنہ طور پر پہلی بار ہندوستانی ٹیم کی جرسی میں میدان پر اتر سکتا ہے۔

آج کے میچ میں ہندوستان کی پلیئنگ الیون:

ابھشیک شرما، سنجو سیمسن (وکٹ کیپر)، ایشان کشن، شریئس ایئر (کپتان)، تلک ورما، شیوم دوبے، اکشر پٹیل، واشنگٹن سندر، ہرشت رانا، عرشدیپ سنگھ اور پرسدھ کرشنا۔