ویمنس ٹی-20 عالمی کپ کا مکمل شیڈیول جاری، ہندوستان اور پاکستان کے درمیان 14 جون کو ہوگا مہامقابلہ

ایک طرف مرد کرکٹ ٹیموں کا ’ٹی-20 عالمی کپ‘ آب و تاب کے ساتھ جاری ہے، اور دوسری طرف ’ویمنس ٹی-20 عالمی کپ‘ کا مکمل شیڈیول جاری کر دیا گیا ہے۔ 12 جون سے 5 جولائی تک انگلینڈ اینڈ ویلس میں ہونے والا یہ ٹورنامنٹ خاتون کرکٹ کے لیے ایک تاریخی موڑ تصور کیا جا رہا ہے۔ جاری شیڈیول کے مطابق خاص بات یہ ہے کہ گروپ مرحلہ میں ہی ہندوستان اور پاکستان کی ٹیمیں آمنے سامنے ہوں گی، جس سے ٹورنامنٹ کو زبردست آغاز ملنے کی امید ہے۔ ہندوستان اور پاکستان کے درمیان مہامقابلہ 14 جون کو ایجبسٹن میں کھیلا جائے گا۔

گزشتہ ماہ نیپال میں کھیلے گئے کوالیفائر کے بعد 12 ٹیموں کا لائن اَپ طے ہوا ہے۔ میزبان انگلینڈ کے علاوہ بنگلہ دیش، آئرلینڈ، نیدرلینڈ اور اسکاٹ لینڈ نے بھی کوالیفکیشن کے ذریعہ ٹورنامنٹ میں اپنی جگہ بنائی ہے۔ اس بار یوروپی ممالک کی شراکت داری زیادہ دیکھنے کو مل رہی ہے۔ انگلینڈ، آئرلینڈ، اسکاٹ لینڈ اور نیدرلینڈ جیسی 4 یوروپی ممالک کی موجودگی کے ساتھ ٹورنامنٹ میں ایک تہائی ٹیمیں یوروپ سے تعلق رکھتی ہیں، جو اس ٹورنامنٹ کی تاریخ میں پہلی بار ہوا ہے۔

ویمنس ٹی-20 عالمی کپ 2026 میں ’گروپ-1‘ کو ’گروپ آف ڈیتھ‘ مانا جا رہا ہے۔ اس گروپ میں مضبوط ٹیموں کے ساتھ ہندوستان اور پاکستان کی روایتی ٹکر بھی دیکھنے کو ملے گی۔ ’گروپ-1‘ میں ہندوستان اور پاکستان کے علاوہ آسٹریلیا، جنوبی افریقہ، بنگلہ دیش اور نیدرلینڈ ہیں۔ ’گروپ-2‘ میں ویسٹ انڈیز، انگلینڈ، نیوزی لینڈ، سری لنکا، آئرلینڈ اور اسکاٹ لینڈ کی ٹیمیں ہیں۔

اس ٹورنامنٹ کا افتتاحی مقابلہ 12 جون کو ایجبسٹن میں انگلینڈ اور سری لنکا کے درمیان کھیلا جائے گا۔ انگلینڈ 20 جون کو ہیڈنگلے میں اسکاٹ لینڈ سے اور 24 جون کو لارڈس میں ویسٹ انڈیز سے مد مقابل ہوگا۔ انگلینڈ اور نیوزی لینڈ کے درمیان مقابلہ 27 جون کو اوول میں کھیلا جائے گا۔

ہندوستان کے مقابلوں کی بات کریں تو پاکستان سے 14 جون، نیدر لینڈ سے 17 جون، جنوبی افریقہ سے 21 جون، بنگلہ دیش سے 25 جون اور آسٹریلیا سے 28 جون کو آمنا سامنا ہوگا۔ اس ٹورنامنٹ میں مجموعی طور پر 5 ٹریپل ہیڈر مقابلے ہوں گے۔ یعنی 5 دن ایسے ہوں گے جب 3 میچ دیکھنے کو ملیں گے۔ اسی طرح 5 ڈبل ہیڈر مقابلے بھی دیکھنے کو ملیں گے۔ پہلا سیمی فائنل مقابلہ 30 جون کو اور دوسرا سیمی فائنل مقابلہ 2 جولائی کو اوول میں کھیلا جائے گا۔ فائنل مقابلہ لارڈس میں 5 جولائی کو ہوگا۔