آر سی بی کی شاندار جیت، پنجاب کنگز کو 23 رن سے ہرا کر پلے آف میں پہنچنے والی پہلی ٹیم بنی

دھرم شالہ: رائل چیلنجرس بنگلورو نے آئی پی ایل 2026 میں اپنی شاندار کارکردگی جاری رکھتے ہوئے پنجاب کنگز کو 23 رن سے شکست دے دی اور پلے آف میں پہنچنے والی پہلی ٹیم بن گئی۔ ہماچل پردیش کرکٹ ایسوسی ایشن اسٹیڈیم میں کھیلے گئے اس اہم مقابلے میں آر سی بی نے پہلے بلے بازی کرتے ہوئے 4 وکٹ پر 222 رن کا بڑا اسکور کھڑا کیا، جس کے جواب میں پنجاب کنگز کی ٹیم 20 اوور میں 8 وکٹ پر 199 رن ہی بنا سکی۔

223 رن کے ہدف کے تعاقب میں پنجاب کنگز کی شروعات انتہائی خراب رہی۔ اوپنر پریانش آریہ کھاتہ کھولے بغیر آؤٹ ہوئے جبکہ پربھسمرن سنگھ صرف 2 اور کپتان شریس ائیر ایک رن بنا کر پویلین لوٹ گئے۔ ٹیم نے صرف 19 رن کے اندر تین اہم وکٹ گنوا دیے، جس کے بعد پنجاب دباؤ سے باہر نہیں نکل سکی۔

درمیانی اووروں میں مارکس اسٹوئنس نے 25 گیندوں پر 37 رن بنا کر اننگز سنبھالنے کی کوشش کی جبکہ کوپر کونولی نے 22 گیندوں پر 37 رن کی مفید اننگز کھیلی۔ سوریا نش شیڈگے نے بھی 35 رن بنائے، لیکن سب سے متاثر کن بلے بازی ششانک سنگھ نے کی۔ ساتویں نمبر پر اترنے والے ششانک نے صرف 27 گیندوں پر 56 رن بنا کر کچھ دیر کے لیے پنجاب کی امیدیں زندہ کیں، تاہم انہیں دوسرے بلے بازوں کا ساتھ نہیں ملا اور ٹیم ہدف سے 23 رن دور رہ گئی۔

آر سی بی کی جانب سے رسکھ سلام ڈار نے بہترین گیند بازی کرتے ہوئے 4 اوور میں 36 رن دے کر 3 وکٹ حاصل کیے۔ بھونیشور کمار نے 2 کھلاڑیوں کو آؤٹ کیا جبکہ جوش ہیزل ووڈ، سُیش شرما اور روماریو شیفرڈ کے حصے میں ایک، ایک وکٹ آئی۔

اس سے پہلے آر سی بی کے بلے بازوں نے جارحانہ انداز اختیار کرتے ہوئے پنجاب کے گیند بازوں پر دباؤ بنایا۔ وراٹ کوہلی نے ایک مرتبہ پھر ذمہ دارانہ اننگز کھیلتے ہوئے 37 گیندوں پر 58 رن بنائے، جس میں 4 چوکے اور 3 چھکے شامل تھے۔ دوسری جانب وینکٹیش ائیر نے شاندار فارم کا مظاہرہ کرتے ہوئے 40 گیندوں پر ناٹ آؤٹ 73 رن اسکور کیے۔ انہوں نے اپنی اننگز میں 8 چوکے اور 4 چھکے لگائے۔

دیودت پڈیکل نے بھی تیز رفتاری سے 45 رن بنائے جبکہ ٹم ڈیوڈ نے آخری اووروں میں 12 گیندوں پر 28 رن کی برق رفتار اننگز کھیل کر اسکور کو 222 تک پہنچانے میں اہم کردار ادا کیا۔ پنجاب کنگز کی جانب سے ہرپریت برار نے 2 وکٹ حاصل کیے جبکہ ارشدیپ سنگھ اور یزویندر چہل کو ایک، ایک کامیابی ملی۔

اس جیت کے ساتھ آر سی بی کے 13 میچوں میں 18 پوائنٹس ہو گئے ہیں اور ٹیم جدول میں پہلے مقام پر پہنچ گئی ہے۔ دوسری طرف پنجاب کنگز کو مسلسل چھٹی شکست کا سامنا کرنا پڑا ہے۔ ٹیم کے 13 میچوں میں 13 پوائنٹس ہیں اور اب اس کی پلے آف کی راہ کافی مشکل دکھائی دے رہی ہے۔