آئی پی ایل 2023: پنجاب کنگز نے کیا فاتحانہ آغاز، بارش کے خلل والے میچ میں کولکاتا 7 رن سے ہارا

پنجاب کنگز نے کولکاتا نائٹ رائیڈرس کو آئی پی ایل کے بارش سے متاثر مقابلے میں ہفتہ کے روز ڈکورتھ لوئس ضابطہ (ڈی ایل ایس) کے تحت 7 رن شے ہرا دیا۔ پنجاب نے بھانوکا راج پکشے (50 رن) کی شاندار نصف سنچری اور دیگر بلے بازوں کی چھوٹی لیکن اہم پاریوں کی بدولت 20 اوور میں 5 وکٹ کے نقصان پر 191 رنوں کا بہترین اسکور بنایا۔ کولکاتا نے 16 اوور میں جب 7 وکٹ پر 146 رن بنائے تھے تبھی تیز بارش شروع ہو گئی اور کھیل روکنا پڑ گیا۔ کھیل رکنے کے وقت کولکاتا کی ٹیم ڈی ایل ایس کے حساب سے 7 رن پیچھے تھی۔

کولکاتا کی طرف سے ونکٹیش ایئر نے 28 گیندوں میں 34 رن، آندرے رسل نے 19 گیندوں میں 35 رن، کپتان نتیش رانا نے 24 رن اور رحمن اللہ گرباز نے 22 رن بنائے۔ پنجاب کی طرف سے بائیں ہاتھ کے تیز گیندباز عرشدیپ سنگھ نے 19 رن دے کر 3 وکٹ لیے، جبکہ سیم کرن، ناتھن ایلس، سکندر رضا اور راہل چاہر نے 1-1 وکٹ لیا۔

اس سے قبل کولکاتا نے ٹاس جیت کر پہلے گیندبازی کرنے کا فیصلہ کیا۔ پنجاب کی طرف سے پربھ سمرن سنگھ نے 12 گیندوں میں 23 رن بنا کر تیز شروعات دی۔ کپتان دھون اور راج پکشے نے دوسرے وکٹ کے لیے 86 رن کی شراکت داری کی جو انتہائی اہم ثابت ہوئی۔ راج پکشے نے محض 32 گیندوں پر 50 رن بنائے۔ سکندر رضا نے 13 گیندوں میں 16 رن اور سیم کرن نے 17 گیندوں پر 26 رن بنائے، جبکہ شاہ رخ خان نے 7 گیندوں پر 11 رن کا تعاون کیا۔ ان کے علاوہ جتیش شرما نے بھی 11 گیندوں پر 21 رن بنائے۔ کولکاتا کی طرف سے ٹم ساؤتھی نے 54 رن دے کر 2 وکٹ لیے، جبکہ امیش یادو، سنیل نارائن اور ورون چکرورتی کو 1-1 وکٹ حاصل ہوئے۔