خاتون ٹی-20 ایشیا کپ 2022: ہندوستانی ٹیم کا اعلان، پاکستان کے ساتھ مقابلہ 7 اکتوبر کو

خاتون ٹی-20 ایشیا کپ 2022 کے لیے ہندوستانی کرکٹ کنٹرول بورڈ (بی سی سی آئی) نے ہندوستانی خاتون ٹیم کا اعلان کر دیا ہے۔ بورڈ نے ٹیم کی کمان ہرمن پریت کور کو سونپی ہے اور اسمرتی مندھانا کو نائب کپتان بنایا گیا ہے۔

قابل ذکر ہے کہ خاتون ٹی-20 ایشیا کپ 2022 کی شروعات یکم اکتوبر سے ہوگی جس میں 7 ٹیمیں حصہ لے رہی ہیں۔ یہ ٹورنامنٹ 15 اکتوبر تک بنگلہ دیش کے سلہٹ میں کھیلا جائے گا۔ ہندوستان اپنے شروعاتی میچ میں سری لنکا کا سامنا کرنے اترے گا۔ لیکن سبھی کو انتظار 7 اکتوبر کا ہے جب ہندوستان کا مقابلہ پاکستان سے ہوگا۔

خاتون ٹی-20 ایشیا کپ مقابلہ راؤنڈ رابن طرز پر کھیلا جائے گا۔ اس میں سرکردہ چار ٹیمیں سیمی فائنل کے لیے کوالیفائی کریں گی۔ ہندوستان کے علاوہ پاکستان، بنگلہ دیش، سری لنکا، یو اے ای، تھائی لینڈ اور ملیشیا کی ٹیمیں اس ٹورنامنٹ کا حصہ ہیں۔

ہندوستان اپنی مہم کی شروعات یکم اکتوبر کو سری لنکا کے خلاف کرے گا۔ اس کے بعد ملیشیا سے 3 اکتوبر کو اور یو اے ای سے 4 اکتوبر کو ہندوستان کا مقابلہ ہوگا۔ 7 اکتوبر کو پاکستان، 8 اکتوبر کو میزبان بنگلہ دیش اور 10 اکتوبر کو تھائی لینڈ سے ہندوستان کا مقابلہ طے ہے۔ گویا کہ ہندوستانی ٹیم 10 دنوں کے اندر 6 لیگ میچز کھیلے گی۔ ٹورنامنٹ کا سیمی فائنل 11 اور 13 اکتوبر کو کھیلا جائے گا۔ فائنل مقابلہ 15 اکتوبر کو ہوگا۔

ہندوستانی ٹیم: ہرمن پریت کور (کپتان)، اسمرتی مندھانا (نائب کپتان)، دیپتی شرما، شیفالی ورما، جیمما روڈرگس، ایس میگھنا، رچا گھوش (وکٹ کیپر)، سنیہا رانا، ڈائلن ہیم لتا، میگھنا سنگھ، رینوکا ٹھاکر، پوجا وستراکر، راجیشوری گائیکواڈ، رادھا یادو، کے پی نوگرے۔

اسٹینڈ بائی کھلاڑی: تانیا سپنا بھاٹیا، سمرن دل بہادر۔