جنوبی افریقہ میں تاریخی فتح کے بعد ورلڈ ٹیسٹ چمپئن شپ رینکنگ میں ہندوستان بنا نمبر 1

ہندوستانی ٹیم نے جنوبی افریقہ کو کیپ ٹاؤن ٹیسٹ میں محض دو دنوں کے اندر شکست دے کر سبھی کو حیران کر دیا۔ یہ تاریخی جیت اس لیے بھی بہت اہم ہے کیونکہ پہلی بار کسی ایشیائی ٹیم نے جنوبی افریقہ کو کیپ ٹاؤن میں ہرایا ہے۔ اس جیت نے ہندوستان کے لیے ایک اور خوشخبری دی ہے۔ وہ خوشخبری یہ ہے کہ ہندوستانی ٹیم اب ورلڈ ٹیسٹ چمپئن شپ رینکنگ میں نمبر 1 پوزیشن پر پہنچ گئی ہے۔

جنوبی افریقہ کے خلاف دوسرے ٹیسٹ میں ملی فتح کے بعد ہندوستانی ٹیم نے زوردار چھلانگ لگاتے ہوئے نمبر 1 پوزیشن حاصل کر لیا ہے۔ اس میچ سے قبل ہندوستانی ٹیم اس پوائنٹ ٹیبل میں نمبر 6 پر تھی۔ اب ہندوستانی ٹیم 4 میچ میں 2 جیت کے ساتھ 26 پوائنٹ حاصل کر چکی ہے۔ ایک میچ میں اسے شکست ملی ہے جبکہ ایک میچ ڈرا رہا۔ اِس وقت ہندوستانی ٹیم کا جیت فیصد 54.16 ہے جو کہ سبھی ٹیموں سے بہتر ہے۔

ہندوستان کی اس جیت کا اثر پاکستان پر بھی ہوا ہے اور وہ اب ڈبلیو ٹی سی پوائنٹس ٹیبل میں چھٹے نمبر پر پہنچ گیا ہے۔ پاکستان 4 میچ میں 2 جیت کے ساتھ چھٹے نمبر پر ہے۔ اس کے حصے میں دو جیت کے ساتھ دو شکست بھی ہیں اور جیت کا فیصد 45.83 ہے۔ اس رینکنگ میں دوسرے مقام پر جنوبی افریقہ ہے جس نے 2 ٹیسٹ میچ کھیلے ہیں جن میں ایک جیت اور ایک شکست ملی ہے۔ جیت کا فیصد 50 ہے۔ تیسرے مقام پر نیوزی لینڈ اور چوتھے مقام پر آسٹریلیا ہے۔ بنگلہ دیش پاکستان سے اوپر پانچویں مقام پر ہے۔ ویسٹ انڈیز، انگلینڈ اور سری لنکا بالترتیب ساتویں، آٹھویں اور نویں نمبر پر ہے۔