آئی سی سی ٹیسٹ رینکنگ: گیندبازی میں آر اشون اوّل مقام پر برقرار، بلے بازی میں ٹاپ 3 پوزیشنز پر آسٹریلیائی قابض

آئی سی سی نے آج تازہ ٹیسٹ رینکنگ جاری کر دی۔ ڈبلیو ٹی سی فائنل 2023 کے بعد جاری اس رینکنگ میں آسٹریلیائی کھلاڑیوں کو زبردست فائدہ پہنچا ہے۔ آئی سی سی کی طرف سے جاری تازہ ٹیسٹ رینکنگ میں ٹاپ 3 مقامات پر آسٹریلیائی بلے بازوں کا قبضہ ہو گیا ہے۔ پہلے مقام پر مارنس لابوشین برقرار ہیں جن کے 903 ریٹنگ پوائنٹس ہیں۔ دوسرے نمبر پر اب اسٹیو اسمتھ آ گئے ہیں جنھیں ایک مقام کا فائدہ ملا ہے۔ اسمتھ کے پاس ابھی 885 ریٹنگ پوائنٹس ہیں۔ نمبر تین پر ٹریوس ہیڈ نے قبضہ جما لیا ہے۔ ہیڈ نے تین مقامات کی چھلانگ لگائی ہے۔ ان کے پاس 884 ریٹنگ پوائنٹس ہیں، یعنی وہ اسمتھ سے محض ایک ریٹنگ پوائنٹ نیچے ہیں۔ ٹیسٹ بلے بازی رینکنگ میں اس وقت ٹاپ-10 میں صرف ایک ہندوستانی بلے باز ہے اور وہ ہیں رشبھ پنت۔ ان کے 758 ریٹنگ پوائنٹس ہیں۔

ٹیسٹ گیندبازی رینکنگ میں اس مرتبہ کوئی زیادہ تبدیلی دیکھنے کو نہیں ملی ہے۔ آر اشون نے ڈبلیو ٹی سی کا فائنل نہیں کھیلا تھا، اس کے باوجود اب بھی وہ پہلے مقام پر قابض ہیں۔ ان کے پاس 860 ریٹنگ پوائنٹ ہیں۔ جیمس اینڈرسن 850 ریٹنگ پوائنٹس کے ساتھ نمبر 2 مقام پر ہیں۔ نمبر 3 پر 829 کی ریٹنگ کے ساتھ پیٹ کمنس ہیں۔ نمبر 4 پر 825 ریٹنگ کے ساتھ کگیسو رباڈا ہیں جبکہ پاکستان کے تیز گیندباز شاہین آفریدی نمبر 5 پر ہیں۔

آل راؤنڈر کی ٹیسٹ رینکنگ کی بات کی جائے تو اس میں نمبر 1 اور نمبر 2 پر ہندوستانی کھلاڑیوں کا قبضہ ہے۔ پہلے مقام پر رویندر جڈیجہ ہیں اور دوسرے مقام پر اشون قابض ہیں۔ ان دونوں کے علاوہ نمبر 4 پر اکشر پٹیل ہیں۔ بہر حال، ٹیسٹ رینکنگ میں بابر اعظم، کین ولیمسن اور جو روٹ کو نقصان ہوا ہے۔ بابر اعظم 862 رینکنگ پوائنٹس کے ساتھ پانچویں مقام پر آ گئے ہیں۔ ولیمسن دو پائیدان کھسک کر چوتھے مقام پر آ گئے ہیں، جبکہ جو روٹ 861 ریٹنگ کے ساتھ چھٹے مقام پر آ گئے ہیں۔