سی پی ایل: ’ٹرینباگو نائٹ رائیڈرز‘ نے مایہ ناز آل راؤنڈر ڈوین براوو کی نمبر 47 جرسی ریٹائر کر دی

ٹرینباگو نائٹ رائیڈرز نے نمبر 47 کی جرسی ریٹائر کر دی ہے۔ ویسٹ انڈیز کے عظیم آل راؤنڈر ڈوین براوو ٹرینباگو نائٹ رائیڈرز (ٹی کے آر) کے لیے کھیلتے ہوئے یہی جرسی پہنتے تھے۔ براوو کی خدمات کو دیکھتے ہوئے ان کی جرسی کو ریٹائر کیا گیا ہے۔ وہ سی پی ایل کے پہلے کھلاڑی ہیں جن کی جرسی ریٹائر کی گئی ہے۔ نائٹ رائیڈرز گروپ کے سی ای او وینکی میسور نے ایک تقریب میں کہا کہ ’’نائٹ رائیڈرز اور سی پی ایل میں ڈوین براوو کی خدمات کو الفاظ یا اعداد میں بیان کرنا ناممکن ہے۔ نمبر 47 کو ریٹائر کرنا براوو کی وراثت کو فرنچائز کے ساتھ ہمیشہ کے لیے محفوظ رکھنے کے مترادف ہے۔ سی پی ایل کی تاریخ میں یہ اعزاز حاصل کرنے والا پہلا کھلاڑی بننے کے لیے براوو سے زیادہ موزوں کوئی کھلاڑی نہیں ہو سکتا۔‘‘

واضح رہے کہ ڈوین براوو اب بین الاقوامی اور لیگ کرکٹ سے ریٹائر ہو چکے ہیں۔ سی پی ایل میں براوو نے 107 میچ کھیلے اور 129 وکٹیں حاصل کیں۔ براوو سی پی ایل کی تاریخ کے تیسرے سب سے کامیاب گیند باز ہیں۔ سنیل نارائن 139 وکٹوں کے ساتھ پہلے اور عمران طاہر 135 وکٹوں کے ساتھ دوسرے نمبر پر ہیں۔ براوو فی الحال ٹرینباگو نائٹ رائیڈرز کے کوچ ہیں۔ وہ 2015 سے 2025 تک ٹیم کے لیے کھیلے اور اس دوران 5 مرتبہ ٹیم کو چمپئن بنانے میں اہم کردار ادا کیا۔ 2017 اور 2018 میں وہ ٹیم کے کپتان بھی رہے۔ اس دوران براوو 2021 میں سینٹ کٹس اینڈ نیوس پیٹریاٹس کے کپتان بھی رہے۔

ٹرینباگو نائٹ رائیڈرز کے موجودہ کپتان نکولس پورن نے فرنچائز کی جانب سے شیئر کی گئی ایک ویڈیو میں کہا کہ ’’ہمیں تحریک دینے اور ہمارے لیے رول ماڈل بننے کا شکریہ۔ ہمیں بہت خوشی ہے کہ آپ ہمارے ساتھ ہیں۔ ہمارے بڑے بھائی ہونے کے لیے شکریہ۔‘‘ سنیل نارائن نے کہا کہ ’’میرا خیال ہے کہ آپ نے بہت سے نوجوان کرکٹرز کے لیے راستہ ہموار کیا ہے۔ آپ ہمیشہ اپنی توانائی برقرار رکھتے ہیں اور ہر حال میں جیت حاصل کرنا چاہتے ہیں۔‘‘ 2020 میں ٹرینباگو نائٹ رائیڈرز کے کپتان رہنے والے کیرون پولارڈ نے کہا کہ ’’ایک شخص کے طور پر آپ نے میرے لیے جو کچھ بھی کیا ہے، اس کے لیے آپ کا شکریہ۔‘‘