پہلے ٹیسٹ میں بنگلہ دیش نے پاکستان کو 104 رن سے دی شکست، چوتھی اننگ میں 163 رن پر آل آؤٹ ہو گئی پوری ٹیم

بنگلہ دیش نے پاکستان کے خلاف ڈھاکہ میں کھیلے گئے 2 میچوں کی ٹیسٹ سیریز کے پہلے مقابلے میں 104 رن سے جیت حاصل کر لی ہے۔ شان مسعود کی قیادت میں کھیل رہی پاکستانی ٹیم 268 رن کے ہدف کا تعاقب کرتے ہوئے 163 رن پر آل آؤٹ ہو گئی۔ اس طرح بنگلہ دیش نے پہلا ٹیسٹ اپنے نام کر سیریز میں 1-0 کی برتری حاصل کر لی ہے۔

ڈھاکہ کے شیرِ بنگلہ اسٹیڈیم میں کھیلے گئے اس مقابلے میں پاکستان نے ٹاس جیت کر پہلے گیند بازی کا فیصلہ کیا تھا۔ بنگلہ دیش نے اپنی پہلی اننگ میں 413 رن بنائے تھے۔ مومن الحق نے 91 رن کی اننگ کھیلی اور کپتان نجم الحسن شانتو نے 12 چوکوں اور 2 چھکوں کی مدد سے 101 رن کی شاندار اننگ کھیلی۔ ان دونوں کے علاوہ مشفق الرحیم نے 71، لٹن داس نے 31 اور تسکین احمد نے 19 گیندوں میں 28 رن کی طوفانی اننگ کھیلی۔ پاکستان کی جانب سے محمد عباس نے 5 وکٹیں لیں، جبکہ شاہین آفریدی 3، حسن علی اور نعمان علی 1-1 وکٹ حاصل کرنے میں کامیاب ہوئے۔

413 رن کا تعاقب کرتے ہوئے پاکستان کی پہلی اننگ 386 رن پر سمٹ گئی۔ اذان اویس نے 14 چوکوں کی مدد سے 103 رن بنائے۔ اس کے علاوہ امام الحق نے 45 اور عبد اللہ فضل نے 60 رن کی اننگ کھیلی۔ ان کے علاوہ محمد رضوان نے 59 اور سلمان آغا نے 58 رن بنائے۔ کپتان شان مسعود 9 رن اور سعود شکیل صفر پر آؤٹ ہو گئے۔ بنگلہ دیش کی جانب سے مہدی حسن معراج نے 5 وکٹیں حاصل کیں، جبکہ تسکین احمد اور تیج الاسلام 2-2 وکٹیں اور ناہد رانا ایک وکٹ حاصل کرنے میں کامیاب ہوئے۔

واضح رہے کہ بنگلہ دیش کو پہلی اننگ کی بنیاد پر 27 رن کی برتری ملی۔ اپنی دوسری اننگ میں بنگلہ دیش نے 9 وکٹ کے نقصان پر 240 رن بنا کر اننگ ڈکلیئر کر دی۔ مومن الحق نے 56 اور کپتان نجم الحسن شانتو نے 87 رن کی شاندار اننگ کھیلی۔ ان کے علاوہ مشفق الرحیم نے 22 اور مہدی حسن معراج نے 24 رن کی اننگ کھیلی۔ اس طرح بنگلہ دیش نے 267 رن کی مجموعی برتری حاصل کی اور پاکستان کے سامنے 268 رن کا ہدف رکھا۔ پاکستان کی جانب سے دوسری اننگ میں نعمان علی اور حسن علی نے 3-3 وکٹ لیں۔ شاہین آفریدی 2 اور عباس ایک وکٹ حاصل کرنے میں کامیاب رہے۔

جواب میں پاکستان کی دوسری اننگ 163 رن پر سمٹ گئی۔ عبداللہ فضل نے سب سے زیادہ 66 رن بنائے، اس کے علاوہ کوئی بھی پاکستانی بلے باز 50 کا ہندسہ عبور نہیں کر پایا۔ سلمان آغا نے 26 اور رضوان-اویس نے 15-15 رن بنائے۔ ان کے علاوہ کوئی بھی بلے باز دہائی کا ہندسہ عبور نہیں کر پایا۔ بنگلہ دیش کی جانب سے ناہد رانا نے 5 وکٹیں حاصل کیں، جبکہ تیج الاسلام اور تسکین احمد 2-2 وکٹیں اور مہدی حسن معراج ایک وکٹ حاصل کرنے میں کامیاب ہوئے۔ میچ میں شاندار بلے بازی کا مظاہرہ کرنے والے نجم الحسن شانتو کو پلیئر آف دی میچ کے ایوارڈ سے نوازا گیا ہے۔ دونوں ٹیموں کے درمیان دوسرا ٹیسٹ 16 مئی سے سلہٹ انٹرنیشنل کرکٹ اسٹیڈیم میں کھیلا جائے گا۔