بنگلہ دیش نے پاکستان کو ٹیسٹ سیریز ہرانے کے ساتھ ساتھ ’ڈبلیو ٹی سی رینکنگ‘ میں 4 ممالک کو چھوڑا پیچھے

بنگلہ دیش نے پاکستان کے خلاف 2 ٹیسٹ میچوں کی سیریز میں شاندار کارکردگی کا مظاہرہ کرتے ہوئے کلین سویپ کر دیا ہے۔ اس کلین سویپ کا اثر آئی سی سی ورلڈ ٹیسٹ چیمپئن شپ (ڈبلیو ٹی سی) کی رینکنگ، یعنی پوائنٹس ٹیبل پر بھی دیکھنے کو ملا ہے۔ بنگلہ دیش کو ملی آج دوسرے ٹیسٹ میں فتح کے بعد نہ صرف پاکستان کو ڈبلیو ٹی سی پوائنٹس ٹیبل میں نقصان اٹھانا پڑا ہے، بلکہ ہندوستانی ٹیم کی پوزیشن بھی متاثر ہوئی۔

پاکستان کے خلاف سیریز جیتنے کے بعد بنگلہ دیش پوائنٹس ٹیبل میں پانچویں نمبر پر پہنچ گیا ہے۔ بنگلہ دیش نے اب تک 4 ٹیسٹ میچوں میں 2 فتوحات، ایک شکست اور ایک ڈرا کے ساتھ 58.33 فیصد پوائنٹس حاصل کیے ہیں۔ دوسری جانب ہندوستانی ٹیم 9 میچوں میں 4 جیت، 4 شکست اور ایک ڈرا کے بعد 48.15 فیصد پوائنٹس کے ساتھ چھٹے نمبر پر کھسک گئی ہے۔ اس طرح بنگلہ دیش کی کامیابی نے ہندوستان کو ایک درجہ نیچے دھکیل دیا۔

شبھمن گل کی قیادت میں ہندوستانی ٹیم اب افغانستان کے خلاف ایک ٹیسٹ میچ کھیلے گی، تاہم یہ میچ ورلڈ ٹیسٹ چیمپئن شپ کا حصہ نہیں ہوگا۔ ایسے میں ہندوستان کے پاس سری لنکا کے خلاف 2 ٹیسٹ میچوں کی آئندہ سیریز میں بہتر کارکردگی دکھا کر اپنی پوزیشن مضبوط کرنے کا موقع ہوگا۔ بنگلہ دیش کو آج پاکستان کے خلاف ملی کامیابی کا ایک اور اہم اثر یہ ہوا کہ اس نے پوائنٹس ٹیبل میں پاکستان، ہندوستان، انگلینڈ اور ویسٹ انڈیز، یعنی 4 ممالک کو پیچھے چھوڑ دیا ہے۔

فی الحال آئی سی سی ورلڈ ٹیسٹ چیمپئن شپ 27-2025 کے پوائنٹس ٹیبل میں آسٹریلیا پہلے نمبر پر موجود ہے، جس کے 84.50 فیصد پوائنٹس ہیں۔ دوسرے نمبر پر نیوزی لینڈ 77.78 فیصد پوائنٹس کے ساتھ موجود ہے جبکہ جنوبی افریقہ 75 فیصد پوائنٹس کے ساتھ تیسرے نمبر پر ہے۔ سری لنکا کو اس پوائنٹس ٹیبل میں چوتھا مقام حاصل ہے۔