ایشیا کپ 2025: ہندوستان-پاکستان میچ کی ٹکٹ کیوں نہیں ہو رہی فروخت؟ 14 ستمبر کو ہونا ہے مقابلہ

عام طور پر ہندوستان-پاکستان میچ کی ٹکٹ چند گھنٹوں میں ہی فروخت ہو جاتی ہے، لیکن اتوار (14 ستمبر) کو ہونے والے ایشیا کپ مقابلہ کی ٹکٹ فروخت ہی نہیں ہو پا رہی ہے۔ جو خبریں سامنے آ رہی ہیں، اس کے مطابق میچ میں صرف 2 روز رہ گئے ہیں اور بڑی تعداد میں ٹکٹیں فروخت ہونی باقی ہیں۔ ٹکٹ فروخت نہ ہونے کی ایک وجہ اس کی زیادہ قیمت بتائی جا رہی ہے، لیکن ایک وجہ روہت-وراٹ بھی بتائے جا رہے ہیں۔

رپورٹس کے مطابق ٹکٹوں کی اونچی قیمت نے فروخت کو متاثر کیا ہے۔ ایسٹ اسٹینڈ میں 2 وی آئی پی ٹکٹوں کی قیمت 2.5 لاکھ روپے ہے۔ اس ٹکٹ کو خریدنے پر ناظرین کے لیے بہترین سیٹ کے ساتھ کھانے پینے کا بھی انتظام ہوگا۔ اس ٹکٹ کو خریدنے پر پارکنگ پاس، وی آئی پی لاؤنج اور ریسٹ روم بھی ملے گا۔ وی آئی پی ٹکٹ کے علاوہ رائل باکس میں ٹکٹ کی قیمت 2.3 لاکھ، اسکائی باکس کے لیے 1.6 لاکھ روپے خرچ کرنے ہوں گے۔ یہاں تک کہ پلاٹینم ٹکٹ کی قیمت بھی آسمان چھو رہی ہے، جو 75659 روپے میں مل رہی ہے۔ سب سے سستی ٹکٹ کی بات کریں تو 2 سیٹ بُک کرنے کے لیے آپ کو تقریباً 10000 روپے خرچ کرنے ہوں گے۔

خبر رساں ایجنسی ’اے این آئی‘ سے بات چیت میں امارات کرکٹ بورڈ کے ایک افسر نے بتایا کہ ہندوستان-پاکستان میچ کی ٹکٹوں کی کم فروخت سے تمام افسران چونک گئے ہیں۔ انہوں نے بتایا کہ چمپئنز ٹرافی کی ٹکٹ 4 منٹ کے اندر فروخت ہو گئی تھی، لیکن اس بار حالات بہت خراب ہے۔ افسر نے خدشہ ظاہر کرتے ہوئے کہا کہ ’’ٹکٹوں کی فروخت میں کمی کی ایک وجہ روہت شرما اور وراٹ کوہلی کی غیر موجودگی بھی ہو سکتی ہے۔‘‘ قابل ذکر ہے کہ ٹیم انڈیا نے 10 ستمبر کو ایشیا کپ میں اپنا پہلا میچ یو اے ای کے ساتھ کھیلا، جس میں اسے 9 وکٹوں سے جیت ملی تھی۔ اب ہندوستان کا دوسرا مقابلہ 14 ستمبر کو پاکستان کے ساتھ ہوگا۔